Dili, 10 Fevereiru 2021 – Prezidensia Repúblika no Centro Nacional Chega! halo enkontru ho família husi membru Governu Primeiru Governu Repúblika Demokrátika Timor-Leste tinan 1975 hodi husu sira nia opiniaun kona-ba Memoriál Proklamasaun ne’ebé sei harii iha Palacio Nobre Lahane, Dili.
Iha diskusaun ne’e, Chefe Casa Sivil Prezidensia Repúblika Sr. Francisco Maria Vasconcelhos hateten katak Memoriál Proklamasaun iha Palasiu Nobre hanesan pontu determinante ba Estadu Timor-Leste tanba ne’e estadu rasik iha hanoin atu bele hadia liu tan memoriál ne’e.
Entertantu parte família agradese ba Prezidensia Repúblika no Centro Nacional Chega! tanba iha inisiativa atu fó rekoñesimentu ba Prezidente Repúblika, Primeiru Ministru ho nia membru governu sira.
Iha diskusaun ne’e, Centro Nacional Chega! aprezenta mós esbosu dezeñu memoriál iha área identifikadu atu halo instalasaun ba monumentu sira iha aredores Palasiu Nobre, Lahane – Dili.
Memoriál ne’e sei estabelese iha aredores Palacio Nobre nian ho forma busto Prezidente Repúblika Francisco Xavier do Amaral, Primeiru Ministru Nicolau dos Reis Lobato ho nia membru governu sira, inklui ho testu no gravasaun audio Proklamasaun Independénsia RDTL iha tinan 1975.
Palacio Nobre Lahane – Dili, fatin ne’ebé Prezidente Repúblika Demokrátika Timor-Leste Francisco Xavier do Amaral no Governu Dahuluk RDTL simu posse iha fim Novembru 1975, molok okupasaun Indonezia iha 7 Dezembru 1975.
