Sobrevivente Domingos dos Santos, moris iha loron 21 Juñu 1983, iha Suku Vatuvou, Postu Administrativu Maubara, Munisípiu Liquiça. Nia nu’udar oan daruak husi maun-alin na’in 5, husi ai-funan domin inan Fatima Boavida no aman Calistro de Jesus. Domingos ho idade 39 kaben ho Rosita no sira iha oan na’in 4, feto na’in no mane na’in 2.
Iha tempu passadu, Domingos partisipa iha luta ukun rasik-an nu’udar estafeta ba FALINTIL (Forsa Armada Libertasaun Nasional Timor-Leste) iha Rejiaun IV. Iha loron 6 Abríl 1999 akontese masakre Igreza Liquiça, Domingos hetan kapturasaun husi TNI (Tentara Nasional Indonesia), Polisia Indonézia no Milisia sira, hodi halo torturasaun baku ho kilat, tebe, tuku no sona ho tudik. Depois lori nia ba kastigu durante loron 8 iha Koramil Polsek Maubara. Hafoin kontinua lori ba Polisia Munisípu Liquiça. Durante iha komarka laran, Militár no Polísia Indonézia halo nafatin torturasaun. Asaun brutalidade ne’ebé Militár, Polísia no Milisia sira halo ba nia tanba nia partisipa luta ba ukun rasik-an.
Sofrementu ne’ebé Domingos hetan iha tempu passadu, ohin loron afeita ba nia kondisaun saúde tanba ulun no ain moras, forsa laiha, susar halo to’os no buka osan hodi sustenta uma laran.
Ho problema hirak ne’e, Centro Nacional Chega!I.P servisu hamutuk ho Asosiasaun Vitima Konflitu Polítiku 1974-1999 hanesan parseiru implementadór halo konstrusaun uma “Da Memória À Esperança” ba Domingos dos Santos iha suku Vatuvou. Uma ho medida 9×7, kompostu husi, Kuartu 3, sala 1, haris fatin 1, varanda 1 no mos dapur, kompleta ho instalasaun eletrisidade, plafon no keramik, exeptu dapur ho totál kustu $ 14.800 inklui ona selu badae.
Uma “Da Memória À Esperança” nu’udar parte ida husi implementasaun Mandatu Centro Chega! nian tuir Dekretu Lei 48/2016 mak atu tau-matan no apoiu Sobrevivente sira husi Violasaun Direitu Umanu ne’ebé akontese iha periodu1974-1999. Nune’e mos nu’udar programa prioridade Governu Konstitusional Oitavu nian ne’ebé hatur iha CNC nia responsabilidade atu fó tulun ba prezervasaun memória pasadu sira no kontinua promove direitu umanu no rekonsiliasaun.
Media Chega!
