Dili – (13 Marsu 2026), Diretór Ezekutivu Centro Nacional Chega!I.P, Hugo Maria Fernandes hateten, Muzeu Memórial Munisipal ne’ebé Centro Chega!I.P estabele iha Munisipiu sira tenke prezerva ema baibain nia istória pasadu periodu 1974-1999 kona-ba sira nia kontribuisaun luta ba ukun rasik-an.

“Muzeu memórial sira ne’e ita jere ho sentidu ida katak Muzeu povu nian, Muzeu ema nian, Muzeu  ema baibain sira, ne’ebé sira nia kontribuisaun, sira nia partisipasaun ne’e fo signifikadu boot ba ita nia istoria”, dehan Diretór Ezekutivu hato’o iha diskursu serimonia asina Akordu Servisu Hamutuk (ASH) ho Muzeu Memórial Munisipal 4 hanesan, Muzeu Memórial Munisipal Bobonaro, Muzeu Memórial Munisipal Covalima, Muzeu Memórial Munisipal Manatuto no Muzeu Memórial Munisipal Viqueque, ne’ebé hala’o iha Salaun Konferensia Centro Chega!I.P, Antigo Comarca Balide.

Centro Chega!I.P asina ASH ho Muzeu Memórial Munisipal 4 ho objetivu atu apoiu fundu ba fortalesimentu institusional liu-liu apoiu ba atividade sira no mos ba servisu operasional nian. Kada Muzeu Memórial Munisipal sei hetan osan hamutuk $ 17,500.00 (Dólar Amerikanu Rihun Sanulu Resin Hitu Atus Lima).  Total orsamentu ba Muzeu Memórial Munisipa 4 hamutuk $ 70,000.00 (Dolar Amerikanu Rihun Hitu Nulu) ho durasaun tinan ida.

Diretór akresenta katak, Centro Chega!I.P estabelese Muzeu Memórial Munisipal nu’udar lala’ok ida reparasaun koletiva iha sosiedade ida ne’e. Nu’udar mos maneira ida reparasaun simboliku koletivu. La’os de’it atu prezerva memória, maibé mos ida ne’e atu fo ondra ba ema sira iha nivel munisipiu sira nia partisipasaun.

Iha fatin hanesan, Reprezentante Muzeu Memorial Munisiapal, Maria Carvalho Amaral hanesan mos Koordenadora Muzeu Memorial Munisipal Covalima hato’o agradesimentu ba Centro Chega!I.P ne’ebé kontinua fo apoiu fundu ba sira atu hala’o atividade sira Muzeu Memórial nian no mos ba servisu operasional. Nia mos husu ba Centro Chega!I.P atu kontinua apoiu sira.

“Ami husu Centro Chega!I.P apoiu nafatin ami, ami ba iha munisipiu mos keta husik ami atu nune’e ita nia parseiru ne’e kontinua”, Koodenadora rekomenda.

Dadaun ne’e, Centro Chega!I.P estabelese ona Muzeu Memórial Munisipal 6 hanesan Muzeu Memorial Munisipal Viqueque, Muzeu Memorial Munisipal Covalima, Muzeu Memorial Munisipal Aileu, Muzeu Memorial Munisipal Bobonaro, Muzeu Memorial Munisipal Manatuto no Muzeu Memorial Munisipal Manufahi. Iha tinan 2026 Centro Chega!I.P sei estabelese tan Muzeu Memórial Munisipal 2 hanesan Liquiça no Rejiaun Administrativa Espesial Oekuse Ambeno (RAEOA).

Muzeu Memórial Munisipal estabelese atu responde ba misaun Centro Chega! I.P nian mak promove implementasaun rekomendasaun sira hosi relatóriu final Comissão de Acolhimento, Verdade e Reconciliação (CAVR) no no Per Memóriam Ad Spem (PMAS) relasiona ho institusionalizasaun memória no promosaun direitus umanus. Centro Chega!I.P estabelese Muzeu Memórial Munisipal hanesan mekanizmu ida atu halibur,habelar, no hakbesik narrativu sira kona-ba istória pasadu Timor-Leste nian, liu-liu ida-ne’ebé relasiona ho partisipasaun komunidade munisipiu idaidak nian durante periodu luta ba ukun rasik-an tinan 1974-1999.

Media Chega!.