Dili, 27 Jullu 2021, Centro Nacional Chega!I.P nu’udar institutu publiku ne’ebé estabelese ho dekretu lei Nu. 48/2016 ho nia servisu halo prezervasaun ba memória pasadu inklui sítiu istóriku sira iha Timor-Leste koopera ho Ministériu Turizmu, Komersiu no Industria sei rehabilita Sítiu Istóriku 4 iha Dili, iha tinan ida ne’e.
Antes ne’e, MTCI liu husi Diresaun Vise-Ministériu Turizmu Komunitária no Kulturál hamutuk ho Centro Chega! halo ona identifikasaun ba Sítiu Isóriku 10 iha Dili ne’ebé sei estabelese nu’udar fatin destinasaun ba turista sira, no liu husi enkontru ne’ebé realiza entre Ekipa Centro Chega! ne’ebé lidera husi Diretór Ezekutivu Interinu Sr. Metodio Caetano Moniz akompaña husi Diretór Divizaun Relasaun Externa Komunikasaun no Advokasia (DREKA) Sr. Gaudencio Soares Souza no Xefe Divizaun Perkiza no Arkivu Istóriku (DPAI), Aventino de J. B. Ximenes halo ona enkontru ho Diretór Jerál Ministériu Turizmu Komersiu no Industria (MTCI), Jelino Soares iha Farol-Dili hodi halo diskusaun ba kooperasaun servisu.
Tuir Diretór Ezekutivu Interino Centro Chega! Sr. Metodio Caetano Moniz, objetivu enkontru ho Diretor Jeral MTCI mak ko’alia kona-ba kooperasaun servisu entre instituisaun rua hanesan Centro Chega! no MTCI hodi halo ajustamentu planu ba dezenvolve sítiu istóriku 10 ne’ebé identifikadu ona.
“Oras ne’e dadaun Centro Chega! prepara hela planu annual, ho ida ne’e mak Centro Chega! hakarak halo enkontru ho Ministériu Turizmu, Komersiu no Industria (MTCI) hodi halo ajustamentu ba planu nune’e ba futuru instituisaun rua ne’e bele servisu hamutuk”, dehan Sr. Metodio iha sala enkontru Diretor.
Nia haktuir, Centro Chega! nia haree katak, halo rehabilitasaun ba sítiu istóriku 10 ne’ebé identififika ona, ita presiza haree orsamentu atu aloka ba parte sira ne’ebé ita presiza hodi nune’e orsamentu labele dupla.
Alende ne’e, Diretór Divizaun Relasaun Externa Komunikasaun no Advokasia (DREKA), Sr. Gaudencio Soares Souza reforsa, durante ne’e ekipa rua identifika ona sítiu istóriku 10 iha sidade Dili, no agora tenke fó prioridade ba rehabilitasaun.
Parte Centro Chega! nia haree katak, iha sítiu haat mak sai prioridade hanesan, Casa Eropa, Cámara Eclesiastika Dioseze Dili iha Colmera, San Tai Hoo no Uma Adat Tasi Tolu. Enkuantu Sítiu Istóriku 6 sei rehabilita iha tinan oin mak hanesan: 1. Ponte Cais Dili, Monumentu 7 Dezembru 1975. 2. Pusat Budaya Indonezia (Eis Fatin Detensaun Prizioneiros). 3. Simitériu Santa Cruz. 4. Monumentu Marabia. 5. Palasiu Nobre Lahane no 6. Komarka Balide.
“Karik bele tinan oin, MTCI bele aloka ba iha ne’ebá, importante fahe tarefas, MTCI bele haree nia rehabilitasaun, Centro Chega! bele haree iha laran ne’e no oinsa atu tau art museum, hodi prense nia istória”, Sr. Gaudencio sujere.
Sr. Gaudencio afirma, hanoin sira ne’e tenke deskute no tau idea hamutuk sai planu hodi bele defende hamutuk iha orsamentu jerál estadu nian tanba ne’e iha relasaun inter-servisu ba malu. Servisu sira ne’e la’o ona mak sei halo promosaun ba publiku, maibé ita mos sei fo formasaun ba joven sira hodi hala’o servisu ida ne’e.
Bazeia ba esplikasaun hirak ne’e, Diretór Jeral Ministeriu Turizmu, Komersiu no Industria (MTCI), Sr. Jelino Soares konkorda no apresia ba esplikasaun husi ekipa Centro Chega! nian, no nia kompremetidu katak, parte MTCI prontu responsavel ba rehabilitasaun fíziku sítiu istóriku 4 ne’ebé sei hala’o iha tinan ida ne’e no mos sei aliña planu ne’e sai nu’udar planu annuál.
Sr. Julino mos iha esperansa, ba futuru Centro Chega! ho MTCI bele servisu hamutuk di’ak liu tan atu bele haree sítiu istóriku sira iha teritoriu Timor laran tomak hodi dezenvolve sai fatin di’ak ba turista sira.
