Dili, iha loron 14 Jullu 2021, Diretór Centro Nacional Chega!I.P, Sr. Hugo Maria Fernandes ho Ekipa Centro Chega! hamutuk ho Vise-Ministra Turizmu Komunitáriu no Kulturál, Dra. Inácia da Conceição Teixeira ho ekipa halo vizita ba Sítiu Istóriku 10 iha Dili laran, ne’ebé sei sai hanesan fatin destinasaun ba turista sira.
Vizita ba Sítiu Istóriku 10 ne’e, nu’udar vizita kontinuasaun (vizita ba dala rua) hafoin Ekipa Tékniku husi Ministériu Turizmu, Komersiu no Industria ho Ekipa Centro Chega! halo observasaun no peskiza kiik ba Sítiu Istóriku 15 iha Dili laran, hodi hili fali Sítiu Istóriku 10 ne’ebé sei estabelese nu’udar Sítiu destinasaun ba tursita sira, tantu ba Turista Estranjeiru, nune’e mós turista rai laran.
Vizita ba sitiu istoriku ne’e mós ho intensaun atu parte rua (2) hodi rekoilla dadus no halo survey direita ba fatin sira ne’ebé prienxe kriteria hanesan asesu dalan ba transporte, dominiu publiku no kriteria bazika sira seluk ne’ebé esensial no oinsa atu hadia iha futuru.
Fatin istóriku sira iha Sidade Dili ne’ebé ekipa rua vizita ona mak hanesan:
- Ponte Cais Dili, Monumentu 7 Dezembru 1975
- Cámara Eclesiastika Dioseze Dili iha Colmera
- Casa Europa (Eis Kodim)
- Pusat Budaya Indonesia (Eis Polres Dili)
- Semitériu Santa Cruz
- Palasiu Nobre Lahane
- Monumentu Marabia
- Komarka Balide (Atual edifisiu CNC)
- Sang Tai Ho, Colmera (Eis Fatin Detensaun Prijoneiros)
- Uma Adat Tasi Tolu
Sítiu Istoriku 10 ne’e iha futuru, parte rua sei dezenvolve sai nu’udar sítiu istóriku iha Sidade Dili, nune’e bele dada turista lokál no internasionál hodi vizita inklui sai hanesan memória ba jerasaun foun atu kontinua prezerva iha futuru.
