Relembra fali mai ita hotu katak, iha loron 6 Setembru 1999, iha POLRES Maliana Iha enkontru ida ne’ebé mak partisipa husi Komandante POLRES Maliana Maijór Budi Susilo, Komandante Komando Distrik Militer (KODIM) Tenente Koronel Burhanuddin Siagian, Bupati (Administradór) Maliana, Guilherme dos Santos, Xefe Intelijén KODIM, Tenente Sutrisno, Komandante Milisia Halilintar, João Tavares, Ketua DPRD no FPDK (Forum Persatuan Demokrasi dan Keadilan) Jorge Tavares, Lider DMP Ritabou no Vise FPDK Natalino Monteiro Gonsalves, no mós komandante DMP Maliana Marcos Tato Mali. Rezultadu husi enkontru ne’e mak fó orden atu populasaun Maliana nian ba refujia iha POLRES Maliana, no ikus mósu Masakre POLRES Maliana iha loron 8 Setembru 1999.
Iha loron 8 Setembru 1999, Membru Milisia Dadurus Merah Putih (DMP) no Militár Indonézia halo atake no oho populasaun sira ne’ebé deskonfia apoiante pro-independénsia, ne’ebé halibur malu iha Polisi Resor (POLRES) Maliana nia oin ). Iha akontesimentu ne’e sira oho ema hamutuk na’in sanulu-resin-tolu (13), inklui mós labarik mane ida ho tinan 12.
Ema sira ne’ebé mate iha POLRES Maliana mak hanesan: Manuel Barros, Julio Barros, Domingos Gonçalves Pereira, José da Costa Guterres, José Abel, Francisco Paixão Fatima Martins, Martinho Marques, José Barros Soares, Lorenço dos Santos Gomes, Joaquim Monteiro Gonçalves, José Moniz da Cunha, Damião da Cruz no Daniel Barreto. (Manuel Barros hanesan membru DPRD Maliana & Lider CNRT, Julio Barros hanesan Eis-Administradór Postu Maliana, Domingos Gonçalves Pereira hanesan Xefe Suku Ritabou, no José Barros Soares mak labarik ho idade tinan 12, oan husi lider CNRT Augustinho Soares).
Nune’e mos, iha loron 9 Setembru 1999, Membru Milisia Dadurus Merah Putih (DMP) no Militár Indonézia oho tan ema na’in sanulu-resin-tolu (13) ne’ebé halai sai husi POLRES Maliana iha mota ida besik área Mulau.
Ema sira ne’ebé oho iha fatin ne’e mak hanesan: Lider CNRT Munisipiu Bobonaro Sub-Rejiaun no Kolaborador Regiaun Manuel Magalhães, Lamberto de Sá Benevides, Abilio Marques Vicente, Augusto dos Santos Marques, José Barreto, Pedro Luis, Lucas dos Santos, Luis Soares, Jeroni Lopes, Domingos Titi Mau, Carlos Maia, Ernesto da Coli no Paul da Silva.
