Dili – (26 Juñu 2024), IX Governu konstitusional liu husi Ministeriu Administrasaun Estatal (MAE) fo apresiasaun ba ekipa Centro Nacional Chega! Instituto Publiku (CNC I.P), tanba halo uma ba vitima no sobrevivente vulneravel sira iha teritoriu Timor laran tomak.
Apresiasaun ne’e hato’o husi Vise Ministeriu Administrasaun Estatal (MAE), Jacinto Rigoberto de Deus iha diskursu inagurasaun no entrega Uma Memória ba Esperansa (UMbE) ka Uma “Da Memória À Esperança” ba sobrevivente vulneravel nain 2 hanesan Pedro Pereira de Araujo no Antonia Carvalho Soares.
“Hau reprezenta Governu mai hakarak hato’o ami nia apresiasaun, parabens ba inisiativa Diretór Ezekutiva ho ekipa no mos Konsellu ba ideia di’ak, hodi bele fasilita ita nia sobrevivente sira,” dehan Vise iha Aldeia Au-hun, Suku Becora, Postu Administrativu Kristu-Rei, Munisipiu Dili.
Nia reforsa, hanesan Governu apresia tebes ba ideia ida ne’e i deseza katak, kontinua nafatin atividade halo uma tanba ita hatene katak sobrevivente barak iha Timor-Leste ita seidauk identifika tanba ne’e apoiu.
Hanesan Vise Ministru “hau haree katak ne’e importante, pertinente tanba MAE agora extende ninia meius atendementu to’o iha baze liu husi rekrutamentu apoiu ba suku sira hodi apoiu to’o postu no munisipiu i sira bele tulun ita atu identifika ita nia sobrevivente sira”.
Durante ukun-an estadu halo esforsu barak ona hodi identifika valoriza no rekoñese sira, maibé ita mos tenke rekoñese mos katak, vitima no sobrevivente balun, ita seidauk tau matan ba sira tanba ne’e presiza iha servisu integradu ho intensaun mak atu kontinua koopera no koolabora malu di’ak liu tan.
Nia mos agradese ba CHL (Community Housing Limited) ne’ebé mai apoiu dezeñu no kontribui ba prosesu konstruaun ida ne’e, tanba ne’e lori Governu nia naran agradese no hein katak ida ne’e sai modelu no referensia ba MAE atu aban bainrua iha programa halo uma ba povu kbiit laek, MAE sei uza dezeñu ne’e.
Diretór Ezekutivu CNC I.P, Hugo Maria Fernandes esplika, lori Centro Chega! nia naran hakarak hato’o profunda gratidaun ba Vise MAE tanba ita boot nia disponibilidade hodi hit-an mai iha fatin ida ne’e, nu’udar jestu ida atu kontinua apoiu ba sobrevivente sira.
“Uma ida ne’e uma 3, uma rua iha Au-hun-Becora, uma ida iha Aisirimou- Aileu. Uma ida ne’e halo ho parseira di’ak tebes entre CNC I.P ho CHL. Uma tolu ne’e kompleta uma 18 ne’ebé mak Centro Chega! hahu harii, balun iha Aileu, Viqueque, Suai, Ainaro, Atauro no Likisa,” nia informa.
Centro Chega! halo ida ne’e nudar programa ida, “ami bolu medida reparativu ba sobrevivente sira oinsa mak estadu iha responsabilidade ba ita nia vitima sira. Buat boot seidauk atu halo maibé neineik estadu aintiji duni ninia responsabilidade mak hnesan halo uma, tratamentu saúde, fo bolsu estudu ba oan sira ne’e hanesan jestu ida ne’ebé estadu liu husi Governu halo hela ba vitima sira.
Nia esplika, Vise Ministru nia prezensa, “ami hei katak uma ida ne’e sai modelu ba dezenvolve uma hanesan ba komunidade sira iha Timor Leste laran tomak. Ami iha esperansa ho MAE alende uma sei iha apoiu seluk tan ami hein de’it selebrasaun nota entendementu ida ho MAE alende apoiu uma ami harii hela Museu Memorial Munisipal sira, no mos rejsitu ba sobrevivente sira,”.
Prezidente Konsellu Administrasaun Centro Chega!, Manuel Mesquita Pereira informa, CNC I.P iha esperansa katak CNC I.P sei asina nota entendementu ida ho MAE atu bele servisu hamutuk iha programa repasaun no area sira seluk.
“Hau hanoin Konsellu Administrasaun CNC nian orsida sei fo apou tomak CNC nian oinsa atu realiza lalais ba kooperasaun sira ne’ebé mak util liu ba apoiu sira modelu hanesan ne’e no mos inisiativa sira seluk ho apoiu husi instituisaun Governu ne’ebé relevante. Ita sei explora liu tan apoiu sira husi seitór publiku,” nia subliña.
Konsellu Administrasaun Centro Chega! garante sei apoiu nafatin ekipa Ezekutivu Centro Chega! atu kontinua hala’o atividade sira hanesan ne’e ba oin.
(Media CNC)
