Kotis Faról nu’udar fatin ida ne’ebé Forsa Indonézia husi Komadu tatiku (komando Taktis/KOTIS) uza hodi detein, halo interogasaun, tortura ba simpatizante no kuadrus FRETILIN nian iha inisiu tinan 1978. Aleinde ne’e, fatin ne’e mos sai fatin ba aprezentasaun periodiku (wajib Lapor) ba detenadu sira ne’ebé livre husi fatin detensaun Sang Tai Hoo hafoin fatin detensaun ne’e taka iha rohan 1978, maibé ho kondisaun tenke halo aprezentasaun kada loron ba komandu Tatiku (Kotis) iha fatin refere. Meius tortura ne’ebé Militar Indonézia sira halo ba detenadu sira iha fatin ne’e mak; Militar Indonézia sira kolu hotu deteinadu sira nia roupa depois hoban iha bee laran durante loron tolu kalan tolu, hafoin ida ne’e Militar Indonézia sira husik lafaek rai maran tama iha bee laran nune’e lafaek rai maran ne’e tata detenadu sira nia isin, tilun, oin no área vital no mos baku detenadu sira. Periodu detensaun iha fatin ne’e diferente ba kada detenadu, balun detein durante semana rua no balun bele to’o fulan hitu. Iha kazu aprezentasaun periódiku iha fatin ne’e akontese detenadu balun mai halo aprezentasaun periodiku iha fatin ne’e no lakon to’o agora.

Naran husi detenadu balun ne’ebé detein iha Kotis Faról nomos lakon wainhira halo aprezentasaun periodiku iha Kotis Faról, Merita Alves (detein iha fatin ne’e durante fulan hitu, husi janeiru 1979 to’o Agustu 1979), Agapito da Conceicão Rocha (detein durante semana Rua), João Baptista Soares (lakon hafoin halo aprezentasaun periodiku iha loron 19 Marsu 1979).

Komandante husi Kotis hotu-hotu mak Major Sunarto. Interrogator sira husi Kotis iha fatin Sang Tai Hoo ho Kotis Faról mak, Major Sinaga, Major Ganap, Major Mukhdi, Kapitaun Ali Musa, Major Sitorus, Major Yani, Major Freddy no nain rua seluk ne’ebé nia diviza deskoñesidu mak Gunardi ho Aziz Hasyim.