Manufahi – (26 Novembru 2025), Vise Ministru ba Asuntu Parlamentar (VMAP) Adérito Hugo da Costa hamutuk ho Prezidente Konsellu Administrasaun, Manuel Pereira ho Autoridade Lokal no mos Asosiasaun Vitima Konflitu Politiku 1974-1999 (AVKP) entrega Uma Memória ba Esperansa (UMbE) ba Sobrevivente, Alexandrino da Costa, iha Aldeia Cledic, Suku Fatuk Ahi, Postu Administrativu Fatuberliu, Munisipiu Manufahi.
UMbE entrega ba Sobrevivente, Alexandrino da Costa tanba nu’udar Vitima ne’ebé uluk hetan turturasaun makas hosi Militar Indonézia, hetan mos kastigu iha Alas no nia kaben mos hetan violasaun direitus umanus oin-oin hosi Militar Indonézia.
Ho problema hirak ne’ebé nia hasoru fo impaktu ba nia moris dalaruma tur mesak hanoin pasadu halo nia sai trauma ne’ebe makas. Hanoin situasaun ne’ebé nia hasoru iha pasadu liga ba nia moris agora, moris susar tebes, sempre ko’alia ho nervozu, kuandu nia konta tuir istoria ne’ebe mak uluk nia ultrapasa sempre hakilar ho lian makas. Na nia kondisaun saude, Centro Chega! Liu husi APPSTL halo ona tratamentu saude mental ba nia iha tinan rua liu ba.
Ba problema kondisaun uma ne’ebé ladignu, Centro Chega!I.P halo Uma ho medida 63m³, kompostu hosi kuartu 3, haris fatin 1, sala vizita I, no dapur iha parte liur ho medida 7.5m.
Objetivivu entrega UMbE ba Sobrevivente Alexandrino da Costa, atu valoriza no dignifika nia kontribuisaun luta ba ukun rasik-an. No mos nu’udar asaun implementasaun rekomendasaun Chega! kona-ba “Reparasaun ba Vitima”.
Tuir dadus Centro Chega!I.P liu hosi Divizaun Solidariedade ba Reparasaun (DSR) rejistu katak, hosi 2021 to’o 2025, Centro Chega!I.P entrega ona Uma Memoria ba Esperansa (UMbE) ba sobrevivente mais vulneravel hamutuk 23.
Antes ne’e, Centro Chega!I.P harii ona UMbE hamutuk 20 ba sobrevivente sira. Iha tinan 2025, Centro Chega!I.P liu hosi Divizaun Servisu Reparasaun (DSR) halo tan UMbE 6 ba sobrevivente sira bazea ba rekomendasaun sira hosi relatóriu Chega! no PMAS liu-liu ba asuntu reparasaun nian. Divizaun ida ne’ebé responsavel ba programa ida ne’e mak Divizaun Servisu Reparativu (DSR) tanba sira nia servisu mak estabelese programa solidariedade apoiu ba sobrevivente no grupu vulneravel sira ne’ebé hasoru violasaun direitus umanus iha pasadu.
Detallu informasaun klik: PDF-1
