(Dili, 08 Janeiru 2024) – Centro Nacional Chega!I.P halo avaliasaun no retiru anuál tinan 2023 ho tema “Rekupera, Reforma no Reforsa”. Alende avaliasaun no retiru anuál, Centro Chega! mos sei halo eleborasaun Planu Operasional (PO), Planu Ezekusaun (PE) Planu Aprovizionamentu (PA) no mós halo ajustamentu ba orsamentu implementasaun atividade tinan 2024.
Objetivu prinsipál husi atividade hirak ne’e mak atu hatene dezempeñu servisu divizaun sira nian durante tinan fiskál 2023, halo identifikasaun ba problema no kauza sira, buka solusaun alternativa no solusaun hodi rezolve.
Atividade retiru anuál ne’ebé realiza, atu pesoál hotu iha Centro Nacional Chega!I.P iha espasu hodi hato’o ka espresa sentimentu emosaun, preokupasaun entre individu ka divizaun servisu iha Centro Nacional Chega!I.P hodi husik obstaklu, dezafiu sira iha tinan 2023, hahi no hawelok valór respeitu, integridade, profesionalizmu no servisu ekipa mak prezente no dalan ba progresivu Centro Chega! iha tinan 2024.
Atividade hirak ne’e hala’o, integra iha programa 4 iha Planu Asaun Anuál (PAA) 2023 kona-ba Programa Boa Governasaun no Jestaun lnstitusionál, ho nia Sub-programa Jestaun Institusionál ne’ebé preve atividade Planeamentu. Monitorizasaun no Estatistika, hodi organiza atividade ka servisu planeamentu, monitorizasaun no avaliasaun.
Avaliasaun atividade trimestrál ka anualmente ne’e nu’udar mekanizmu ida hodi serteja implementasaun atividade tuir prosesu no rezultadu sira mak define ona iha Planu Operasionál, banati ba prinsipiu objetividade iha matadalan monitorizasaun no avaliasaun.
Nune’e, atividade hirak ne’e hala’o atu responde ba misaun no tetu ba planu perioridade Governu nian, tanba Centro Nacional Chega!I.P nu’udar institutu publiku ho personalidade juridika, autonomia administrativa, finanseira no patrimonial ne’e nia jestaun operasionaliza ba planu estratejiku, hatun ba planu servisu tinan-tinan no operasionaliza ba kalendarizasaun hodi organiza no mobiliza rekursu nesesariu sira ba alkansa objetivu mak define ona fazeadamente.
Media CNC
