(Dili, 07 Dezembru 2024) – Centro Nacional Chega!I.P hamutuk ho Governu Federal Alemaña (GFA) halo inagurasaun ba Muzeu Chega!. Atividade ne’e hala’o iha edifisiu Centro Chega!I.P Antigo Comarca Balide, Dili, iha ámbitu komemorasaun loron memória nasional 7 Dezembru/loron invazaun Indonézia iha Timor-Leste 7 Dezembru 1975.
Objetivu husi inagurasaun ne’e mak atu promove muzeu ba públiku liuliu ba estudante no manorin nain sira relasiona ho implementasaun ba rekomendasaun sira husi relatóriu CAVR no CVA, hodi apoia konsolidasaun páz neʼebé sustentavel liu husi fornesimentu espasu ba kura no aprendizajen; fasilidade ba diseminasaun koñesimentu, promosaun ko’alia lia-loos, direitus umanus, edukasaun, paz no konsiénsia jéneru; no reparasaun simbolika ida no rekoñesimentu públiku ba vitima konflitu sira.
Objetivu seluk mak atu introdus Muzeu Chega! ba públiku, liu-liu ba estudante no manorin nain sira. Aumenta vizibilidade Muzeu Chega! nian. Akumula opiniaun jeral no avalia públiku nia interese relasiona ho existensia Muzeu Chega!.
Projetu ne’e apoiu husi Governu Federal Alemaña liu husi asina Akordu Servisu Hamutuk (ASH) Centro Chega!I.P komesa iha tinan 2022 no iha tinan 2023 Governu Federal Alemaña apoiu Centro Chega! ho orsamentu hamutuk $ 442,914.01 ba projetu ne’e durante tinan 2 hahu husi 2023 to’o 2024 ho intensaun mak halo prezervasaun memória pasadu hodi tulun jerasaun foun sira aprende istória pasadu.
Hafoin ida ne’e, Centro Chega! servisu hamutuk ho Sejarah Lintas Batas (SINTAS)-Indonézia hodi kontrata kuradór no dezenadór expozisaun internasional hodi hahu’u dezenvolve konseitu no dezeña espasu expozitivu. lha semana ikus fulan Novembru 2023, kuradór no designer sira finaliza dezeñu tekniku kona-ba expozisaun permanente no temporaria ba redezenvolvimentu Muzeu Antigo Comarca Balide sai nu’udar sentru ida ba konsiensia istórika, direitus umanus no paz iha Timor-Leste.
Nune’e, instalasaun sira ne’ebé halo mak hanesan, Instalasaun Exibisaun Istória Timor-Leste, Instalasaun ba Perfile Ex-Prizoneiru no Ex-Prizoneira sira, Instalasaun Testamuña ba Prizoneiro no Prizoneira sira, Instalasaun Mini Teatru, Instalasaun Exibisaun Istória Labarik sira iha konflitu pasadu, Instalasaun Exibisaun Feto nia Istória, Instalasaun Exibisaun Istória Komunidade Internasional no pintura kona-ba Justisa Tranzisional no Direitus Umanus iha jardin Memória ba Esperansa. Exibisaun hirak ne’e kompleta ho fasilidade eletronika ba asesu informasaun.
Centro Chega! hanesan Centro Nacional ida ne’ebé ho ninia misaun atu halo prezervasaun ba memória pasadu ka memórializasaun, promosaun direitus umanus liu husi edukasaun no formasaun, reparasaun ba sobreviventes ne’ebé vulnerável liu husi violasaun direitu umanu iha pasadu no divulgasaun ba memória pasadu sira hodi garante katak violasaun direitus umanus pasadu la repete tan liu husi servisu advokasia no reforma institusional.
Enkuantu, Centro Nacional Chega! (CNC) I.P nu’udar instituisaun públika iha Repúlika Demokratika Timor-Leste, hari’i iha tinan 2016 liu husi Dekretu-lei nú. 48/2016, ho ninia objetivu atu promove no implementa rekomendasaun sira husi relatóriu Comissão Acolhamento, Verdade e Reconciliação (CAVR) Timor-Leste no Per Memóriam Ad Spem hosi Comissão Verdade e Amizade (CVA) entre Timor-Leste no Indonesia liu husi parseria no mos kolaborasaun ho Parseiru Estratejiku sira hanesan instituisaun Estadu, Governo, Autoridade Munisipais sira to’o ba Lider Komunitaria sira, Organizasaun Sosiedade Sivil (OSS) iha Timor-Leste no mos instituisaun governu no OSS sira husi rai-liur.
(Media CNC)
