(Dili, 06 Marsu 2024) – Centro Nacional Chega!I.P asina ona Nota Entendementu ho Fundo de Desenvolvimeno do Capital Humanos (FDCH), ne’ebé realiza iha Salaun Gabinete Apoiu Orgaun Centro Chega! (GAO-CC), Antigo Comarca Balide-Dili.
Objetivu prinsipal husi asina Nota Entendementu ne’e mak atu hametin kooperasaun iha ámbitu dezenvolvimentu institusional liu-liu ba área kapasitasaun rekursu umanu liu husi estabelesementu kooperasaun Bolsa Estudu ba sobrevivente vulneravel liu nia oan hodi kontinua sira nia estudu iha universidade.
Nota Entendementu ne’e foku ba área Kooperasaun hanesan, atribui Bolsa Estudu ba Sobrevivente Vulneravel nia oan iha Ensinu Superior no Tekniku Vokasional ne’ebé eziste iha Timor-Leste, fasilita benefisiariu ba bolsa estudu husi FDCH hala’o sira nia Estajiu Profesionál durante periodu estudu no mos pos-estudu, kria mekanismu adekuadu ba bolseiru sira no mos iha área Kooperasaun sira seluk.
Nota Entendementu nia validade ba tinan 4 (haat), komesa husi loron asina Nota Entendimentu no bele prolonga ninia durasaun ka bele renova ninia konteúdu tuir nesesidade.
Nota Entendementu ida ne’e, ezije Dever instituisaun idak-idak nian. Dever CNC nian mak, rejista no verifika kandidatu bolseiru sira husi sobrevivente sira ne`ebé ho kondisaun vulneravel hodi submete ba FDCH, submete mos planu orsamentu bolsa estudu ba iha FDCH hodi inklui Orsamentu Jeral Annual, halo mos monitorizasaun, avaliasaun no akompañamentu ba benefisiáriu sira, no mos hato’o Relatóriu monitorizasaun, avaliasaun no akompañamentu regularmente ba FDCH.
Dever FDCH nian mak, estabelese mekanismu atribuisaun bolsu estudu ba benefisiariu bolsu estudu ba sobrevivente nia oan sira, estabelese kontratu atribuisaun ho benefisiariu selesionadu sira, halo mos monitorizasaun no avaliasaun ba benefisiariu sira nia dezempeñu akadémika, no mos halo pagamentu ba bolseiru sira tuir regra finanseiru nian.
Nota Entendementu ne’e halo bazeia ba Misaun CNC nian mak mak promove implementasaun rekomendasoens CAVR relasiona ho institusionalizasaun memória no promosaun direitus umanus liu husi edukasaun, formasaun no solidariedade ba sobreviventes mais vulneraveis husi violasaun direitus umanus, nune’e mos Promove implementasaun rekomendasoens komuns CAVR no CVA kona-ba Reparasaun Memorializasaun konstrusaun sentru nasionál memória, pesquiza no aprendizazen, tuir kna’ar no mandatu ne’ebé hatu’ur ona iha dekrteu lei 48/2016, artigu 7 Colaboração com outras Entidades, temi iha número 3), hamutuk ho artigu 6 Competências, espesifika iha alínea b) no j) husi lejislasaun ida ne´e, ne´ebé aprova estatutu husi Centro Nacional Chega!I.P.
Nune´e, instituisaun rua kompostu husi CNC no FDCH asina Nota Entendementu ne’e banati ba enkuadramentu juridiku sira atribui ba instituisaun idak-idak, hodi bele promove no implementasaun Rekomendasaun sira husi Relatóriu Final Chega! no PMAS liu-liu iha aspeitu apoiu ba dezenvolvimentu kapital umanu Timor-Leste nian.
Centro Nacional Chega!I.P, Da Memória à Esperança (Centro Chega! I.P) hamri’ik nu’udar institutu públiku ida ne’ebé estabelese ho dekretu Lei no. 48/2016. Centro Chega!I.P nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Nia misaun mak: “Harii sentru Pós-konflitu ne’ebé prezerva memória pasadu nian hodi promove direitus no valór umanu, harii parseria nasionál no internasionál hodi reforsa rede servisu sira ba implementasaun rekomendasaun sira husi Relatóriu Finál Comissão de Acolhimento, Verdade e Reconciliação (CAVR)-Chega! no Comissão da Verdade e Amizade (CVA) – Per Memóriam Ad Spem, sira ne’ebé relevante”.
(Media-CNC)
