(Dili, 16 Fevereiru 2024) – Centro Nacional Chega!I.P, asina Nota Entendementu ho Sekretáriu Estadu Arte no Kultura (SEAK) kona-ba promosaun arte no kultura, no implementasaun Rekomendasaun Chega! no PMAS (Per Memoriam Ad Spem!), ne’ebé hala’o iha Salaun SEAK, Praia dos Coqueiros-Dili.
Objetivu prinsipál husi Nota Entenedementu ne’e mak, atu hamutuk hodi promove arte no kultura no implementasaun rekomendasaun sira husi Relatóriu Chega! PMAS (Per Memoriam Ad Spem!), iha âmbitu promosaun arte kultura no prezervasaun memória pasadu nian. Alende ne’e, atu kontinua fó esperansa ba kualidade implementasaun polítika Governu Konstitusional Dasia (9) nian iha área kultura no patrimoniu no rekomendasaun temátiku husi Rekomendasaun Chega! no PMAS, liu-liu promosaun no protesaun patrimóniu kulturál no istóriku nu’udar memória koletivu povu Timor-Leste nian.
Nota Entendementu ne’e foku ba área sira mak hanesan, hamutuk asegura objetivu kooperasaun refleta ba iha planu programa anuál instituisaun idaidak nian, koopera hamutuk hodi koordena implementasaun Festival Fronteira ne’ebé mak sei halo tinan tinan, fasilita malu iha prosesu identifikassaun sítiu istóriku, rejistu patrimoniu kulturál, dezenvolve lejislasaun ba protesaun sítiu istóriku husi 1974-1999, koordena malu hodi aloka rekursu sira, nune’e bele fasilita manutensaun ka rehabilitasaun patrimoniu kulturál ne’ebé mak identifikadu no rejistu ona, halo kordenasaun hodi fasilita fahe dokumentu istóriku ba malu liga ho dokumentu istoriku sira ne’ebé iha relasaun forte ho sítiu istóriku sira no protesaun direitus umanus, servisu hamutuk hodi sosializa informasaun liu husi atividade sira hanesan konferénsia ka semináriu ne’ebé bele hala’o iha nível nasional no mos munisipál no área kooperasaun sira seluk ne’ebé sei determina bazeia ba konsultasaun mutua.
Nota Entendimentu ne’e aplika hahú husi data asinatura no vale períodu tinan lima (5), no sei renova automatikamente ho períodu ne’ebé hanesan bainhira laiha denúnsia husi parte Centro Chega! no SEAK.
Nota Entendementu entre Centro Chega! no SEAK halo, bazeia ba misaun Centro Chega! atu promove implementasaun rekomendasaun sira husi, Comisão Acolhamento Verdade e Reconciliação (“CAVR”) CAVR no Comisão Verdade e Amizade (“CVA”), tuir artigo 5.o no artigu 6.o husi Dekretu-Lei nú. 48/2016, loron 14 dezembru, Cria o Centro Chega!, I.P. Da Memória à Esperança; konjugadu ho atribuisaun servisu espesifiku sira ne’ebé atribui ba CNC kona-ba preservasaun memória istória koletiva prevista iha Artigo 7.º deskreve detallu iha alinea a) to’o e) husi Dekretu-Lei kona-ba regime jurídico de classificação e inventariação de bens interesse cultural bem como as regras aplicáveis à sua exportação e importação.
Media-CNC
