(Díli, 13 Marsu 2026) – Centro Nacional Chega!.I.P ho Fundu Dezenvolvimentu Kapitál Umanu (FDCH) asina kontratu subsidiu estudu ba bolseiru (sobrevivente nia oan) hamutuk na’in 16 kompostu feto 13 no mane 3, ne’ebé hala’o iha Salaun Konferensia Centro Chega!I.P, Antigo Comarca Balide.
Objetivu husi asina kontratu subsidiu estudu ne’e, atu atribui (oferese) bolsa estudu ba sobrevivente nia oan (bolseiru) sira atu kontinua sira nia estudu iha nivel ensinu superior sira iha Timor-Leste hanesan; Universidade Dili (UNDIL), Universidade da Paz (UNPAZ), Universidade Nasional Timor Lorosa’e (UNTL), Instituto Superior Crsital (ISC), Instituto Ciência da Saude (ICS), Institute Of Business (IOB) no Dili Institute of Technology (DIT).
Razaun Centro Chega! ho FDCH oferese bolsa estudu ba sobrevivente nia oan sira hodi asesu edukasaun iha ensinu superior nu’udar garante ba sira nia jerasaun nia futuru di’ak tanba edukasaun nu’udar xave ba hadi’ak oportunidade husi povu nia moris, no hodi konkretiza no alkansa potensia hotu-hotu hodi hasa’e kresimentu ekonomia no desenvolvimento nasionál, ho vizaun mak, labarik hotu-hotu ba eskola no simu edukasaun ho kualidade no permite hodi sira hetan moris saudavel no produtivu kontribui ba dezenvolvimentu nasional.
Haktuir iha Rekomendasaun Comissão de Acolhimento, Verdade e Reconciliação (CAVR)-Chega! nian, relasiona ho reparasaun ba Vítima konflitu politiku pasadu nian, ne’ebé husu ba Governu Timor-Leste hodi garantia moris di’ak ba povu ne’ebé sai vítima funu ba libertasaun patria durante tinan 24 nia laran. Rekomendasaun Chega! kona-ba “Reparasaun 12.12” ne’ebé husu ba governu/estadu Timor-Leste hodi fo bolsu estudu ba vitima sira nia oan ne’ebé mak seidauk bele asesu ba eskola, ensinu sekundária to’o ensinu superior tanba laiha kbi’it ba aspetu ekonomia.
Entertantu, iha tinan 2022 to’o 2026 Centro Chega!I.P ho FDCH oferese ona bolsa estudu ba sobrevivente nia oan hamutuk nain 43 no nain 4 mak gradua ona. Alende ne’e iha tinan 2025-2026 Centro Chega!I.P mos apoiu finanseiru ba graduasaun ba sobrevivente nia oan hamutuk na’in 5.
Bele download dokumentus iha PDF:KomImpr Bolsa Estudu
