Dili – (15 Novembru 2024), Kompetisaun sertame nasional durante loron 2 ne’ebé organiza husi Centro Nacional Chega!I.P no Ministeriu Edukasaun (ME) ne’e, Eskola Sekundaria Jerál Filial Maubara sai primeiru lugar, Segundu lugar no Terseiru lugar mak eskola Eskola Kafe Manatuto no Eskola Sekundaria Publiku Nino Koni Santana Lospalos.
Eskola Sekundariu hamutuk 13 husi Munisipiu 10 mak tuir kompetiaun hanesan, Eskola Sekundariu Jerál 02 Vila Nova Baucau, Eskola Sekundariu Katolika Nosa Senhora de Fatima Railako-Ermera, Eskola Sekundariu Jeral Olocassa Ossu-Viqueque, Eskola Sekundariu Publiku Nino Konis Santana Lospalos-Lautem, Eskola Sekundariu Cafe Manatuto, Eskola Sekundariu Cafe Dili, Eskola Sekundariu Cafe Likisa, Eskola Sekundariu Kristy Sword Gusmão Laleia-Manatuto, Eskola Sekundariu Jeral Hu Iso Lara Iso Maubara-Likisa, Eskola Sekundariu Jeral Nicolão Lobato Tasi Tolu-Dili, Eskola Sekundariu Jeral 5 de Maiu Becora-Dili, Eskola Sekundariu Jeral Malere-Aileu no Eskola Sekundariu Jeral Dom. Martinho Lopez Maliana-Bobonaro.
Rezultadu husi kompetisaun ne’e, konkorente ne’ebé sai, Primeiru lugar mak Eskola Sekundariu Jeral Filial Maubara ho Pontu 1025, Segundu lugar MAK Eskola Cafe Manatuto ho Pontu 725, Terseiru lugar Eskola Sekundariu Jeral Nino Konis Santa Lautem ho Pontu 575 no Kuartu lugar Eskola Sekundariu Jeral Cafe Likisa ho Pontu 450.
Fifania Jeronimo Sarmento husi Eskola Sekundariu Nicolau Lobato Tasi Tolu nu’udar kompetitora ba kompetisaun sertame nasional, ho fuan boot hato’o parabens ba manan nain sira. Maske nia ho ekipa lakon iha kompetisaun maibé sai lisaun ba sira aprende no iha kompetisaun sempre iha manan no lakon
Nia esplika, sira sente kontente tanba bele partisipa iha atividade kompetisaun sertame nasional ne’e hodi bele aumenta koñesimentu, maske iha kompetisaun ne’e lakon maibé bele hatene istória. Liu husi kompetisaun ne’e mos hau bele hatene fatin ida ne’e, Antigu Comarca Balide. Foin primeira vez vizita Antigo Comarca ne’ebé nakonu ho istoria no fatin ne’e furak tebes.
“Ami tuir kompetisaun ne’e maske ami lakon, maibé ami latriste tanba iha kompetisaun ne’e iha menan no lakon. Mezmu ke lakon maibé kontente nafatin tanba hetan esperensia foun ba oin nafatin esforsu-an atu bele hetan di’ak liu tan,” nia dehan.
Estudante Eskola Sekundariu Jerál, Nino Koni Santan Lospalos, Letisia Almeida S. Barreto nu’udar manan nain terseiru lugar kompetisau sertame nasional, sira sente kontente tebes ho rezultadu ne’ebé sira hetan nu’udar esforsu ida durante sira nia preparasaun.
“Sente kontente tebes tanba bele hetan terseiru lugar. Rezultadu ida ne’e mak esforu ami nian durante loron hira nia laran. Materia sira iha kompetisaun ne’e ami aprende iha livru laran, maibe ami mos halo esforsu rasik,” nia esplika.
Joanico Gonçalves dos Santos husi Eskola Sekundaria Jeral Filial Maubara nudar primeiru lugar esplika, sira agradese ba Centro Nacional Chega!I.P no Ministeriu Edukasaun (ME) tanba organiza ona sertame nasional. Sertame nasional importante tebes atu bele enkoraja no motiva estudante sira atu estuda no aprende istória no direitus umanus.
“Ami sente kontente tebes tanba ami mak sai primeiru lugar ba iha sertame ida ne’e. Ami agaradese ba Centro Chega!I.P no mos Ministeriu Edukasaun (ME) ne’ebé hala’o programa ida ne’e. Programa ne’e importante tebes atu bele aprende hodi hatene kona-ba istória timor nian,” nia agradese.
Nia reforsa, materia ne’ebé uza iha kompetisaun ne’e fasil tanba materia sira ne’e aprende ona iha eskola no halo preparasaun durante fulan ida. Esperensia di’ak ne’ebé sira aprende iha kompetisaun sertame ne’e mak tenke esforsu aan estuda tanba liu husi estuda mak ita bele hatene.
Diretór Ezekutivu Centro Nacopnal Chega!I.P, Hugo Maria Fernandes parabeniza ba manan nain sira ba estudante no manorin sira ne’ebé reprezenta eskola hodi partisipa iha sertame nasional durante loron 2 iha Antigo Comarca Balide. Agradese ba ekipa juri no observadór sira ne’ebé partisipa no akompaña prosesu inisiu to’o remata.
Ministeriu Edukasaun (ME) no INFORDEPE durante tinan-5 atu ba 6 ne’ebé parseria di’ak no forte tebes hatudu liu husi diskusaun no formasaun sira kona-ba istória no direitus umanus no implementasaun atividade sira seluk ne’ebé durante ne’e la’o di’ak. “Ami Centro Chega! kontinua hato’o ami nia komprimisu parseria ida ne’e ba oin”.
Reprezentante Ministra Edukasaun (ME), Deolindo da Cruz lori Ministeriu Edukasaun (ME) nia naran hato’o parabens ba estudante sira ne’ebé sai manan nain ba kompetisaun sertame nasional tanba reprezenta eskola hodi hamorin eskola nia naran iha nasional. Ba estudante sira ne’ebé lakon kontinua aprende no estuda.
Ministeriu Edukasaun (ME) kontinua hato’o komprimisu ba kooperasaun servisu iha futuru ho Centro Chega!I.P. Atividade sira ne’ebé Centro Chega! halo liga ba asuntu edukasaun.
(Media CNC)
