Dili – Kompaña Niceles Unipessoal L.da hamutuk konsultór Timoroan sira realiza ona enkontru inception report (relatóriu inisiu) ba Centro Nacional Chega!I.P no Ministeriu Obras Publiku (MOP) liu hosi Dirasaun Nacional Edifikasaun (DNE) iha Salaun Konferénsia Centro Chega! Antifo Comarca Balide Dili, loron 08 Fevereiru 2022.

Diretór Kompaña Niceles Unipessoal Lda, Eng. John Lennon informa, objetivu prinsipál husi enkontru ne’e mak atu halo aprezentasaun inception report kona-ba detallu desain ba konstrusaun Centro Nasionál Arkivu ba Centro Nacional Chega!I.P.

Nia haktuir, inception report ne’e haree husi aspetu Environment, Topografi, Geologi, Geolistrik, Electrical, Water and Sanitation no seluk tan no konsidera katak sira ne’e importante tebes oinsa atu garante kualidade projetu.

Diretór Nacional Edifikasaun (DNE), Domingos Siquira agradese ba kompaña nia aprezentasaun kona-ba inception report, maibé husu ba kompaña atu halo aprezentasaun ruma tenke iha planu asaun (action plan) atu nune’e ajuda MOP hodi halo monitor tuir action plan ne’ebé mak iha.

“Saida mak konsultan halo la’os gratuita. Fó fiar ba imi tanba imi nia matenek no imi nia responsabilidade”, nia sujere.

Diretór Ezekutivu Centro Chega!, Hugo Maria Fernandes agradese ba Kompaña Niceles no konsultór sira tanba halo ona aprezentasaun kona-ba inception report. No agradese mos MOP liu-liu Dirasaun Nacional Edifikasaun (DNE) tanba akompaña ona aprezentasaun no fo ona kritika hodi hadia di’ak loiutan iha futuru.

Iha biban ne’e, Diretór Hugo mos konvida Diretór Kompaña Niceles, iha loron sexta-feira (11/02/2022), atu halo aprezentasaun konseitu dezeña ba Konsellu Administrasaun (KA) nune’e sira mos bele akompaña, antes Centro Chega! foti desizaun finál ba konseitu ne’ebé iha.

Enkontru ne’e partisipa husi Diretór Kompaña Niceles Unipessoal Lda, konsultór, Diretór Dirasaun Nacional Edifikasaun (DNE)-MOP ho ekipa inklui Diretór Centro Chega! ho ekipa no totál partisipante hamutuk kuaze ema na’in rua nulu (20).

Media Chega!