Aileu – iha loron 19 Agustu 2021, Asosiasaun Vítima Konflitu Polítika 1974-1999 servisu ho Komisaun Organizadora Suku Fatisi hamutuk ho família vítima no sobrevivente sira, ho apoiu husi Centro Naciona Chega! realiza semináriu ida hodi Komemora Masakre Fatisi Mota Berloi, Laulara Minisípiu Aileu ho tema “Harmoniza Memória Pasadu hodi Harii Dame Rohan La’ek Ba Jerasaun”.
Liu husi semináriu ne’e, sasin idak-idak hato’o sira nia sentimentu triste no mos kontente ba iha públiku no sira sente todan ne’ebé durante ne’e sira hasoru, bele husik ona todan sira ne’e. Alende ne’e mos sasin sira husi Masakre Fatisi hato’o sentimentu kontente no apresia ba komemorasaun masakre ne’e tanba bele deklara ona sira nia sofrementu ne’ebé durante ne’e sira rai de’it iha sira nia laran ba tinan barak ba públiku liu-liu ba jerasaun foun sira hodi aprende.
Orador sira ba semináriu ne’e mak Adjuntu Administradór Munisípiu Aileu, Segundu Komandante Munisipiu Aileu, Diretór Ezekutivu Centro Nacional Chega!I.P, Diretór AJAR (Asia Justice And Right) no Koordenadór Nasionál Asosiasaun Vitima Konflitu Polítika 1974-1999 no Reprezentante husi Ministériu Asuntu Kombatente Libertasaun Nacionál.
Oradór seluk ne’ebé halo mós aprezentasaun iha Semináriu ne’e mak Reprezentante husi g7+ ne’ebé fahe esperiénsia rai liur ninia kona-ba rekonsiliasaun ba komunidade sira suku Fatisi.
Semináriu ne’e partisipa husi autoridade lokál, lia na’in, komunidade, estudante, juventude, família vítima no sobrevivente sira iha Suku Fatisi.
Entertantu, serimonia ne’e sei taka ho serimonia rekonsiliasaun liu husi nahe biti boot no sei hamulak husi lia na’in sira no bele hakotu sofrimentu husi vitima sira relasiona ho konflitu polítika pasadu.
