Dili – iha loron hirak liu ba, iha loron 9 Agustu 2021, Eis Prizoneiru Polítiku Julio Alvaro hamutuk ho família no oan sira sente kontente tebes tanba bele vizita fila fali nia dadur fatin iha Antigo Comarca Balide, hodi hanoin fila fali istória pasadu tinan 1976 ne’ebé militár Indonézia sira dadur nian hamutuk ho nia kolega sira hanesan Otavio Jordão de Araujo no Justino Mota.

Nia haktuir, vizita ne’e nu’udar vizita dahuluk hodi hanoin hikas istória moruk (aat) ne’ebé enfrenta durante tinan 4 toba de’it iha komarka laran, latoba iha kolisaun leten no sumasu leten maibe toba de’it iha semente leten, liman leten hodi konta ba família no oan sira atu nune’e sira bele hatene.

Oan sira hanesan jerasaun foun tenke hatene istória tanba istória mak nudar aliserse (airin) ba nasaun nian. Nasaun ida hetan independensia la’ós ema entrega de’it mai ita maibé luta ida ne’ebé naruk tebes nakonu ho sofrementu, terus no susar oin-oin.

Tanba momentu militár Indonézia kaer lori ba komarka, nia dehan, ita iha liafuan rua de’it, mate no moris. Iha komarka laran militár Indonézia kastigu ema hamutuk atus ida resin, barak mak mate ona tanba hetan torturasaun no violasaun oin-oin hasoru sira no balun mak sei moris.

Iha komarka laran, nia dehan, “ha’u hakerek liafuan nesta sela da morte” katak sela mate nian katak, ema ne’ebé kastigu ona iha komarka laran nia sei lamoris, nia so mate mak iha. Ita ne’ebé moris ne’e so sorte de’it.  

Julio Alvaro ne’ebé hanesan mós Empresariu ne’e admira, liafuan sira ne’ebé nia hakerek sei kontinua eziste to’o agora. Tanba ne’e nia agradese ba Centro Chega! tanba kontinua prezerva fatin ne’e ho di’ak. Nia informa, luta ba ukun rasik-an la’ós buat ida ne’ebé fasil maibé hasoru dalan terus, dalan todan, dalan ida mate ninia, mak ohin loron Timor sai nasaun ida livre no independente.

Emprezariu timor oan ne’e dehan, kleur ona nia nunka vizita Antigo Comarca to’o agora no ohin mak hanesan oportunidade di’ak lori família no oan sira mai vizita fatin ida ne’e. Tanba ne’e, hakarak agradese no obrigadu barak ba Centro Chega! tanba bele fó autorizasaun hodi halo vizita fatin ne’e.

Emprezariu timor oan ne’e mos husu ba timor oan liu-liu joven sira tenke estuda barak. Joven ohin loron laterus hanesan joven sira uluk. Joven agora tenke aprende barak tanba nasaun presiza joven ne’ebé matenek.

Entertantu iha vizita ne’e, Julio Alvaro ho família sira halo vizita mos ba sela nakukun, fatin arkivu dokumentu no akompaña husi ofisial Divizaun Edukasaun no Formasaun (DEF).