Ho akontesimentu neé, Rama Metan habadak ninia involvimentu funu iha ai-laran. Nuneé, nia deside kontinua estudus iha nivel ensinu superior, hodi iha tinan 1987 hetan Lisensiatura Ekonomia iha Universidade Pendidikan Nasional (UNDIKNAS), Denpasar, Bali, Indonesia ho predikat Summa Cum Laude. Maske nuneé, Rama Metan ninia espiritu nasionalismu no patriotismu hodi luta ba libertasaun patria la mate; hodi iha tinan 1988, hamutuk ho kompatriota nain 9 sira seluk hari organizasaun Resistencia Nacional dos Estudantes de Timor-Leste (RENETIL) iha Denpasar, Bali, hodi organiza no mobiliza estudantes Timor-Oan iha Indonesia hodi luta no rezisti hasoru okupasaun Indonesia. Alem de nudar fundador, iha organizasaun rezistensia estudantil neé Rama Metan asume kargu nudar Responsavel Principal Conselho Curador da Renetil (1990 – 1994), no Koordenador Presidium da Renetil (1994 – 1999).
Partisipasaun iha luta libertasaun patria no dezenvolve kapasidade rekursus umanus hanesan “dua sisi dari mata uang yang sama”. Ba Rama-Metan, atu dezenvolve Timor-Leste ida neébe ukun rasik-an presiza kapasidade rekursus umanus mak adequadu. Hanoin ida neé mos konsagra iha Proklamasaun Insureisaun Politika Estudantes Timor-Leste. Nuneé, maske ativu hela iha luta, Rama Matan kontinua ninia estudus ba nivel mak as liu, hodi iha tinan 1993 nia hasai Mestradodo Gestão Estrategica, iha Faculdade de Economia, Universidade Airlangga (UNAIR), Surabaya, Indonesia. Iha unversidade ida neé mos Rama Metan akaba kursu Doutoramento iha area Micro Economia, iha tinan 1998. Iha “Sidade Lafaek”, Surabaya, Indonesia Rama Metan konsege sai dosente no hanorin iha universidade lubuk ida: Universidade Airlangga, Widya Mandala, Wijaya Kusuma, no Universitas Surabaya (UBAYA).
Remata ninia estudus, Rama Metan fila hias mai Dili hodi asume pozisaun nudar Membru Comissao Politica Nacional (CPN) no Responsavel Departamentu Juventude iha organizasaun Conselho Nacional da Resistencia de Timor-Leste (CNRT), iha tinan 1998 – 2000. Nuneé mos iha CNRT, iha tinan 1999 nia asume pozisaun hanesan Responsavel ba Relasaun Inter-Rejional, Comissao do Planeamento e da Coordenacao Campanha (CPCC).
Hafoin Timor-Leste hakotu okupasaun Indonesia atraves Konsulta Popular iha tinan 1999, Rama Metan hamutuk ho ninia kolega sira seluk hari Universidade de Dili (UNDIL) no sai nudar Reitor, neébe tanba akontese konflitu interna nia hases-an hosi neéba no hari fali Universidade da Paz (UNPAZ) no asume pozisaun nafatin hanesan Reitor ate nia hakotu-is.
Iha periodu ida neé, alem de hari universidade Rama Metan mos ativamente involve iha dinamika politika Timor-Leste ninian. Hamutuk ho kompatriota sira seluk nia hari Partido Democratico (PD) iha tinan 2001 no asume pozisaun hanesan Presidente do Conselho da Politica Nacional (CPN). Atraves partidu politiku ida neé Rama Metan eleitu nudar Deputadu Parlamentu Nasional periodu 2007 – 2012. Iha tinan 2012 nia kandidata-an nudar kandidatu independente ba Presidente da Republica, maibe la konsege halakon Dr. Ramos Horta momentu neéba.
Prof. DR. Lucas da Costa, S.E., Msi., alias Rama Metan, ohin loron la hamutuk ona ho ita, maibe ninia obras, espiritu no valores lubuk ida hela nafatin iha ita nia-let, nudar memória vitalícia, hodi sai hanesan lisaun aprendizajen ba jerasaun-foun ka jerasaun kontinuador sira, hanesan nia konkluza ho lia-fuan murak:
“A defeza intransigente dos direitos do Povo de Timor-Leste e um dever sagrado.”
Fontes Prinsipal: Arquivu Centro Nacional Chega!I.P
Ba hau, maun Lucas da Costa (Rama Metan) ema ida ne’ebe matenek duni, iha simplisidade nia laran. Nia esplika asuntus defisil uza linguazen “rai-laran” ninian, halo ita fasil atu komprende. Nia rona & atende ema hotu-hotu, nunka sukat & hatun ema seluk ho ninia habilitasaun literária.
Boa Viagem maun, Mestre ba Moris & Companheiro da Luta. Hamutuk nafatin ho maun Lasama iha Kadunan Santu.