Lautém – (23 Outobru 2026), Reprezentante Komisaun Organizadora Festival Fronteira 2026 atúal Diretór Ezekutivu Centro Nacional Chega!I.P, Hugo Maria Fernandes hatete, atividade Festival Fronteira ne’ebé, ohin kompleta ba dala-4, hahu husi Munisipiu Bobonaro iha tinan 2023, Rejiaun Administrativu Espesial Oekuse Ambeno (RAEOA) iha tinan 2024, Munisipiu Covalima iha tinan 2025, no tinan 2026 iha Munisipiu Lautém, ne’ebé organiza husi Centro Nacional Chega!I.P, Sekretáriu Estadu Arte no Kultura (SEAK), Ministeriu Administrasaun Estatal (MAE) no Autoridade Munisipiu sira inklui Gabinete Fronteira Trestre no Maritima (GFTM) ho razaun fundamental mak atu hametin relasaun kultural ne’ebé mak sai hanesan mos klamar ba ita ema nia moris.
Rerezentante ne’e haktuir katak, Festival Fronteira ne’e atu serve la’os atu marka distansia jeopolitika. Festival Fronteira la’os mos ba ita sira ne’ebé mak tur iha ne’e, ba katuas, no ferik sira, maibé Festival Fronteira ne’e halo ba jerasaun foun sira atu sira iha koñesimentu kona-ba ita nia kultura kona-ba ita nia lala’ok moris nian husi tempu beala sira to’o agora.
“Festival fronteira atu serve la’os de’it atu marka distansia jeopolitika, politika nu’udar nasaun, nu’udar pais, maibé mos Festival Fronteira atu hametin relasaun kultural, klamar no mos moris ema nian”, dehan Hugo iha diskursu seminariu iha ámbitu Festival Fronteira 2026 ne’ebé realiza iha Suku Com, Postu Lautém, Munisipiu Lautém ho tema “Interkambiu Kultural ba Hametin Rekonsiliasaun”.
Iha oportunidade ne’e, Primeiru Ministru (PM), Kay Rala Xanana Gusmão hato’o apresiasaun ba atividade Festival Fronteira ne’e. Nia dehan, foin primeira vez partisipa iha eventu ida ne’e di’ak tebtebes tanba ne’e, nia rekomenda ba komisaun organizadora, karik bele tinan oin bele hala’o iha Kupang, maibé teknikamente bele halo diskusaun.
Entertantu, atividade Festival Fronteira 2026 hetan abertura husi Primeiru Ministru (PM), Kay Rala Xanana Gusmão no partisipa husi Membru Governu, Membru Parlamentu Nasional, Delegasaun sira husi Timor-Leste no mos husi Indonézia ho entidade sira seluk.
Media Chega!.
