Dili – Centro Nacional Chega!I.P servisu hamutuk ho Universidade da Paz (UNPAZ) realiza semináriu ho tema “A Importanância do Arquivo Históriku do Centro Chega! para o dezemvolvimento da Pesquisa Académica”.
Estudante, Idalia Boavida informa, sente kontente partisipa semináriu ne’e tanba liuhosi semináriu ne’e bele aumenta koñesimentu kona-ba importansia hosi arkivu istóriku mak Centro Chega! iha ba dezenvolvimentu peskiza akadémika.
Tuir nia, dokumentus istóriku kona-ba prosesu luta ukun rasik-an hosi tinan 1974-1999 ne’ebé Centro Chega! prezerva importante tebes ba estudante sira presiza hatene, nune’e ba futuru estudante sira bele halo peskiza.
“Hanesan estudante sente kontente no apresia semináriu ida ne’e, hanesan jerasaun foun presiza duni hatene arkivu istória ne’ebé Centro Chega! prezerva”, dehan Idalia ba Media Chega! iha kampus UNPAZ, Osindo-Dili, Sexta-feira (29/04/2022).
Nune’e, estudante rekomenda ba Centro Chega! ba futuru, “Chega! kontinua nafatin fahe informasaun arkivu ba estudante sira iha eskola hotu liuhosi semináriu, atu estudante sira bele hatene”.
Alende ne’e, estudante, Rio Araujo mós hato’o sentimentu kontente no apresia servisu Centro Chega! tanba halo desiminasaun informasaun kona-ba importansia arkivu istóriku Centro Chega! nian ba estudante sira atu bele hatene.
Ho atividade ne’e, hanesan estudante hakarak rekomenda ba Centro Chega! katak, ba atividade ida ne’e labele para de’it iha ne’e, maibé kontinua nafatin atividade semináriu ne’e ba iha eskola sira seluk nune’e estudante sira seluk bele hetan informasaun kona-ba importansia arkivu..
Nia mós rekomenda ba Centro Chega! atu halo kooperasaun ho Ministeriu Edukasaun Juventude no Desportu (MEJD) atu integra materia istória ba iha kurikulu eskola hodi hanorin estudante sira tanba estudante barak seidauk hatene istória.
Media Chega!
