Delegasaun ida husi Bangsamoro Filipina halo vizita mai Centro Nacional Chega! iha Antigo Comarca Balide, Dili ho objetivu atu aprende prosesu implementasaun Justisa Tranzisionál Timor-Leste ninia nomos nudar vizita solidariedade entre paizes.
Durante iha Timor-Leste, ne’ebe hahu husi loron 09 – 12 Dezembru 2019 delegasaun mós aprende kona-ba Transformasaun Partidu Polítiku ba Governasaun Demokrátiku, Konstrusaun Paz Pos Konflitu no Dezafiu ba Dezenvolvimentu.
Iha Centro Chega!, delegasaun simu diretamente husi Diretór Ezekutivu Hugo Maria Fernandes ho ekipa, no kontinua kedas ho aprezentasaun kona-ba prosesu estabelesimentu CAVR no CVA ho nia rekomendasaun sira no justisa tranzitóriu.
Vizita Delegasaun Bangsamoro ne’ebé kompostu husi Membru Parlamentu, Reprezentante Sosiedade Sivíl no Reprezentante Autoridade Tranzitóriu Bangsamoro ne’e fasilita husi Centro Nacional Chega! no g7+.
Durante iha Timor-Leste, Delegasaun ne’e sei halo vizita ba Parlamentu Nasional, halo audiénsia ho Primeiru-Ministru, hasoru malu ho Reprezentante Partidu Politiku sira no halo vizita ba Munisípiu Liquiça.*
