Manatuto – (28 Outubru 2024), Centro Nacional Chega!I.P realiza formasaun kona-ba Istória, Direitus Umanus Pasadu no Justisa Tranzitóriu ba Komandu Polisia Nasional Timor-Leste (PNTL) munisipiu Manatuto hamutuk 25 kompostu feto 6 no mane 19 mai husi Komandante Eskuadra, Segundu Komandante Eskuadra, Komandante Operasional no Komandante Seksaun sira husi Postu Administrativu Natarbora, Soibada, Laclubar, Laclo no Laleia, Munisipiu Manatuto. Objetivu husi formasaun ne’e mak atu hasa’e sira nia koñesimentu. Formasaun ne’e sei la’o durante loron tolu (3) hahú (28-30).
Formasaun ne’e abertura husi Prezidente Autoridade Interinu Munisipiu Manatuto, Eduardo Guterres katak, formasaun ne’e importante tebes atu hasa’e PNTL sira nia koñesimentu atu hatene ita nia istória pasadu hodi larepete fali violasaun direitus umanus ne’ebé akontese ona.
Prezidente mos fo hanoin ba, Komandu PNTL munisipiu Manatuto katak, agora daudaun Autoridade Munisipiu Manatuto servisu hamutuk ho Centro Chega! hahu halo preparasaun ba estabelesimenu Muzeum Memorial Munisipal Manatuto ho objetivu atu halo prezervasaun ba istória no memoria pasadu munisipiu Manatuto nian.
Iha oportunidade hanesan, Prezidente Konsellu Administrasaun (KA) Centro Chega!, Manual M. Pereira hateten, Formasaun Istória, Direitus Umanus Pasadu no Justisa Tranzitóriu nu’udar esforsu koletiva ida atu ita aprende fila fali ita nia istória ne’ebé akontese iha tempu ne’ebé liu ba, nune’e espera liu hosi formasaun ida ne’e, ita hotu kompromete atu istória moruk sira ne’ebé akontese iha pasadu sei la-repereta tan iha tempu agora no ba futuru”.
“Ita nia esperiansia iha pasadu nu’udar lisaun ne’ebé ita aprende, tanba iha tempu okupasaun Indonézia ema barak sofre tanba violasaun direitus umanus ne’ebé akontese. Violasaun ne’ebé povu sente iha tempu ne’ebá. Timor-Leste nu’udar estadu iha papel atu proteze direitu umanus i garante katak violensia ne’ebé akontese iha pasadu sei la-repete tan”, dehan Prezidente KA.
Prezidente hatutan, Estadu Timor-Leste ratifika ona konvensaun internasional oin-oin inklui konvensaun kontra turtura, ida ne’e hatudu katak Timor-Leste nia komprimisiu atu hakotu violasaun oin-oin hodi kontribui ba ema hotu nia liberdade, maibé violasaun direitus umanus nafatin akontese iha sosiedade, ironiku liu violasaun ne’e sei kontinua eziste iha instituisaun sira ne’ebé iha responsabilidade ba proteze sidadaun sira, tanba ne’e formasaun ida ne’e, importante tebes ba ita hotu-hotu atu esplora ita hotu nia hanoin, fahe istória ba malu oinsa mak ita bele hadi’a ba oin. Centro Chega! hanesan instituisaun ida ne’ebé hari’i atu garante katak istória nakukun iha pasadu la-bele haluha maibé di’ak liu tan mak la-bele repete tan agora no ba futuru.
Komandante Komandu PNTL Munisipiu Manatuto Superintendente Polisia, Umbelina dos Santos Soares esplika, formasaun ida ne’e di’ak tebes Komandu PNTL Munisipiu Manatuto atu bele aumenta sira nia koñesimentu kona-ba Istória, Direitus Umanus Pasadu no Justisa Tranzitóriu.
“Agradese tebes ba formasaun ne’ebé Centro Chega! halo, dala ruma hau akompaña formasaun ida ne’e akontese de’it iha fatin seluk, maibé nunka akontese iha ami nia komandu munisipiu. Ami hakarak agradese ba Centro Chega! tanba bele realiza ona formasaun ida ne’e iha ami nia komandu. Komandu munisipiu hili de’it Komandante sira mak mai tuir formasaun ida ne’e, ho razaun katak sira mak sei hatutan fila fali informasaun ba komunidade no karik loron ruma sira lidera fali instituisaun polisia, bele fahe tutan fali ba sira seluk”, nia tenik.
Enkuantu, atividade ne’e realiza tanba ho kooperasaun entre Centro Nacional Chega!I.P no Komandu Polisia Nasional Timor-Leste (PNTL) munisipiu Manatuto. Tuir Planu formasaun hanesan sei kontinua iha tinan oin ba komandu munisipiu sira seluk inklui Rejiaun Administrativu Espesial Oe-Cusse Ambeno (RAEOA).
(Media CNC)
