Dili – (19 Dezembru 2025), Asosiasaun Vitima Konflitu Politiku 1974-1999 (AVKP) organiza enkontru annual hamutuk ho dirijente Asosiasaun Vitima hosi Munisipiu 12 inklui Rejiaun Administrativu Espesial Oekuse Ambeno (RAEOA) no Atauro ho Konsellu Asosiasaun Vitima 1974-1999 ne’ebé realiza iha salaun Fokupers, Farol-Dili.

Iha enkontru annual ne’e hetan abertura hosi Diretór Ezekutivu Centro Nacional Chega!I.P, Hugo Maria Fernandes, re-afirma komprimisu Centro Chega!I.P nian hodi haforsa kooperasaun ho Asosiasaun Vitima Konflitu Politiku 1974-1999 (AVKP) nu’udar parseiru importante.

Diretór afirma, tinan 2025, Centro Chega!I.P ho Asosiasaun Vitima tama ona tinan-8 kooperasaun nian no hala’o ona atividade lubuk ida mak hanesan, halo Uma Memória ba Esperansa (UMbE) ba Sobrevivente no Vitima sira, apoiu pontual, bolsa estudu, asisténsia saúde, apoiu ekonomia, fortalesimentu institusional no apoiu sira seluk tan.

“Hau hanoin tinan oin kontinua apoiu ba Asosiasaun Vitima, maske seidauk bele reponde hotu, preokupasaun ne’ebé mak Asosiasaun Vitima iha. Ba tinan oin CNC I.P rasik sofre redusaun oituan iha orsamentu”, dehan Diretór Hugo iha diskursu abertura enkontru annual ne’ebé organiza hosi Asosiasaun Vitima.

Diretór afirma tan katak, durante tinan 8 ezisténsia  Centro Chega!I.P halo ona servisu lubuk ida ne’ebé hatudu progresu di’ak, seidauk di’ak liu maibé servisu sira ne’ebé halo iha impaktu pozitivu ida mak konfiansa governu nian ba iha programa sira ne’ebé mak alokadu ba iha Orsamentu Jeral Estadu (OJE).

Diretór mos relata kona-ba servisu sira ne’ebé mak halo liu-liu kona-ba asuntu reparasaun, nia dehan, kona-ba asuntu reparasaun nian, oras ne’e dadaun Grupu Traballu ba Reparsaun (GTR) esforsu hela, “ami halo finalizasaun ba esbosu polítika reparasaun no enkuadramentu juridiku reparasaun. Tinan oin ami planu ita hahu ho konsulta públiku, antes halo submisaun final, para depois sira komesa apar saida mak CNC I.P ho Grupu Traballu Reparasaun ne’e halo”.

Alende ne’e, Centro Chega!I.P mos submete ona Nota Konseitu Rekoñesimentu ba Sobrevivente no Vitima sira ba iha Konselu Ministru (KM), maibé to’o agora ajenda ida ne’e seidauk tama iha ajenda KM nian, tanba ne’e mak esbosu polítika no ekuadrementu juridiku reparasaun sei esforsu hela kuandu finaliza ona bele submete ona ba KM.

Nota Konseitu Rekoñesimentu ne’e atu Orgaun Soberanu sira hanesan Primeiru Ministru (PM), Prezidente Republika (PR) ou Parlamentu Nasional (PN) fo sertifikadu Rekoñesimentu ba Sobrevivente no Vitima funu nian tanba sira fo kontribuisaun luta ba independensia.

Iha biban ne’e, Diretór Ezekutivu apela ba direjente Asosiasaun Vitima no Asosiasaun Eis Prizoneiru Politiku (ASSEPPOL) sira iha Munisipiu sira, atu asegura balansu kontéudu sira iha Muzeu Memórial Munisipál ne’ebé Centro Chega!I.P estabelese ona. Iha Muzeu Memórial Munisipál nia laran tau narativa Sobrevivente no Vitima sira nian barak iha laran tanba Muzeu Memórial Munisipál ne’e sai Instituisaun da Memória ba Vitima sira no ba públiku sira ein jerál.

Husu mos ba direjente Asosiasaun Vitima sira ne’ebé mak tur iha Konsellu Muzeu Memórial Munisipál atu halo kolesaun memória Vitima sira nian. Tinan oin ita integra tan programa Rede Manorin ba iha Muzeu Memórial Munisipál katak, profesor sira ne’eb’e tuir formasaun istória iha Chega! sei organiza estudante sira halo vizita ba Muzeu Memórial Munisipál no vizita sítiu istóriku sira iha Munisipiu objetivu mak atu aprende istória pasadu.

Koodenadór Nasional Asosiasaun Vitima Konflitu Politiku 1974-1999, Domingos P. de Araújo Moniz dehan, enkuantu annual ne’ebé Asosiasaun Vitima Konflitu Politiku 1974-1999 (AVKP) organiza objetivu mak atu avalia servisu sira ne’ebé halo ona no servisu sira ne’ebé seidauk halo fo hanoin ba malu para ba oin hodi hadi’a liu tan.

Media Chega!.