(Dili, 26 Outubru 2023) Centro Nacional Chega!I.P halo ona avaliasaun trimestre datoluk. Avaliasaun ne’e nu’udar parte ida hodi sukat atijimentu ka efetividade implementasaun Planu Asaun Anual (PAA) 2023 kabe ba kalendariu servisu periodikamente, hodi hatene dezempeñu divizaun servisu durante trimestre datoluk nian. Avaliasaun ne’e identifika mos kauza husi problema mak enfrenta durante periodu, hodi define solusaun alternativa ba rezolve no antisipa problema mak hanesan akontese tan iha tempu tuir mai.
Objetivu husi avaliasaun ne’e mak, atu konstrui konfiansa governu kona-ba implementasaun programa mak aprova ona no implementa liu husi avaliasaun impaktu. Objetivu seluk mak, atu sukat implementasaun no ezekusaun orsamentu ho efikas, efisiente no responsavel mak prova ho relatoriu avaliasaun anual, relatoriu servisu operasional, nomos relatoriu auditoria internal.
Avaliasaun ne’e halo bazeia ba Planu Asaun Annual (PAA) 2023 ho programa Boa Governasaun no Jestaun Institusional, ho nia Sub-programa Jestaun Institusional preve atividade Planeamentu, Monitorizasaun no Estatistika, hodi organiza servisu planeamentu, monitorizasaun no avaliasaun.
Lala’ok husi avaliasaun mak, Divizaun sira aprezenta rezultadu servisu komprova ho dokumentu otentiku no validu nu’udar meius verifikasaun, ne’ebé serteja husi Ekipa Verifikadór no Avaliasaun (EVA). Divizaun servisu relevante aprezenta kauza ka problema mak infrenta bainhira la atinji rezultadu planeadu, no alternativa solusaun hodi solusiona kauza problema nian. Partisipante avaliasaun (eseptu divizaun relevante) bele husu esplikasaun ka sujere alternativa solusaun divizaun relevante hodi melloria servisus iha tempu tuir mai:
Partisipa iha avaliasaun mak funsionariu Centro Nacional Chega!I.P no mos Chega! Young Ambassador hamutuk ema na’in 87. Avaliasaun la’o durante loron rua (25-26 Outobru 2023) no partisipa husi Divizaun sira kompostu, Divizaun Edukasaun Formasaun (DEF), Divizaun Peskiza Arkivu Istoriku (DPAI), Divizaun Relasaun Externa Komunikasaun Advokasia (DREKA), Divizaun Solidariedade ba Sobrevivente (DSS), Divizaun Dezenvolvimentu Institusional Rekursu Umanus (DDIRU), Divizaun Finansas Operasional (DFO), Gabinete Apoiu Centro Chega! (GAOCC), Donor Coodination and Resource Mobilization (DCRM) no Projetu Redezenvolvimentu Muzeu Antigo Comarca Balide (MAC-B).
Enkuantu, rezultadu ikus husi avaliasaun hatudu progresu servisu ne’ebé di’ak, maibé ezize nafatin koodenasaun servisu internal divizaun atu mellora servisu ba futuru.
Media Chega!.
