Atauro – Loron Sexta-feira, (06 Agusto 2022), Centro Nacional Chega!I.P hamutuk ho Asosiasaun Vitima Konflitu Polítiku 1974-1999 entrega xave uma memória esperansa ba sobrevivente Faustino Barros Soares da Costa, iha Suku Vila Maumeta, Postu Atauro, Munisípiu Atauro.
Uma ne’e entrega liuhosi serimónia tesi fita hosi Reprezentante Administradór Munisípiu Atauro hamutuk ho Reprezentante Veteranus, autoridade lokál no komunidade sira. Uma ne’e ho medida 9×7, kompostu husi, Kuartu 3, sala 1, haris fatin 1, varanda 1 no mos dapur, kompleta ho instalasaun eletrisidade, plafón no keramik, exeptu dapur ho totál orsamentu $ 14.800.
Uma memória esperansa nu’udar parte ida husi implementasaun mandatu Centro Chega! nian tuir Dekretu Lei 48/2016 mak atu tau-matan no apoiu Sobrevivente sira husi Violasaun Direitu Umanu ne’ebé akontese iha periodu 1974-1999.
Nu’udar programa mós prioridade oitavu Governu konstitusional nian ne’ebé hatur iha CNC nia responsabilidade atu fó tulun ba prezervasaun memória pasadu sira no kontinua promove direitu umanu no rekonsiliasaun.
Reprezentante Diretór Ezekutivu Centro Nacional Chega!I.P, Nelson Miranda informa, Centro Chega! hamutuk ho Asosiasaun Vitima entrega uma memória esperansa ba sobrevivente Faustino tanba uluk sai vitima ba funu no ohin loron kondisaun uma ladi’ak presiza tulun.
Tuir lolos uma ne’e entrega ona iha tinan 2021, iha fulan Dezembru, maibé tanba pandemia Covid-19 no mós failansu tekniku balu, impede prosesu hotu, ohin mak entrega uma ne’e ba sobrevivente, nu’udar maneira dignifikasaun.
“Iha tinan kotuk, Asosiasaun Vitima rekoilla dadus entrega ba Centro Chega!, depois ekipa halo verifikasaun, no tetu katak nia presiza duni uma, tanba nia kondisaun uma ladi’ak. Durante ne’e, nia sofre ba luta ukun rasik-an, nia lakonsege rejistu nu’udar veteranus. Entaun nia prenxe programa uma memória esperansa,” dehan Nelson iha serimónia entrega xave uma memória esperansa ba sobrevivente iha Suku Vila Maumeta.
Uma ne’e harii uza osan estadu nian, tanba ne’e, autoridade lokal sira hotu iha dever atu asegura no tau matan ba uma ne’e para uma ne’e sira utiliza ho di’ak, labele faan, labele fó ba ema seluk .
Xefe Aldeia Iletekaraquia, Carlos do Carmo apresia programa ne’e, nu’udar maneira valoriasaun ida ba sobrevivente ba nia kontribuisaun luta ukun rasik-an.
“Hau sente laran haksolok, kontente tanba Centro Chega! bele fó uma memória esperansa ba sobrevivente ne’e. Uma ne’ebé Centro Chega! fó hanesan valór ida ba sira, atu sira labele terus nafatin,” autoridade apresia.
Ukun-an ida ne’e, ema barak mak sei terus nafatin, balun hetan ona uma, balun mak seidauk hetan. Ba oin Centro Chega! bele tau matan mós ba sira seluk ne’ebé seidauk hetan, atu bele hakmaan sira nia sofrementu.
“Iha suku laran sobrevivente balun seidauk hetan, hau hanoin bele mós fó uma hanesan ba maluk sira seluk ne’ebé mak seidauk hetan,” Xefe Aldeia rekomenda.
Kona-ba lista identifika sobrevivente, nia afirma, hanesan Xefe Aldeia prontu servisu hamutuk ho Centro Chega! no Asosiasaun Vitima atu halo identifikasaun ba sobrevivente ne’ebé mak seidauk rejistu no hetan uma.
Reprezentante Administradór Munisípiu Atauro, Bosco de Jesus Afónso, lori administradór munisípiu Atauro nia naran agradese ba Centro Chega! no Asosiasaun Vitima tanba entrega ona uma ba sobrevivente ne’e.
Ba oin, hakarak sujere de’it, Centro Chega! no Asosiasaun Vitima presiza kria liña komunikasaun no koordenasaun ne’ebé di’ak ho autoridade lokál sira, nune’e bainhira implementa atividade ne’e bele la’o ho di’ak. Uma ne’e hahú halo konstrusaun ita laiha informasaun, atu inagura mak fóin fó hatene.
Maibé ida ne’e hanesan failansu ida, ba oin presiza hadi’a tan ne’e, “agradese ba esfórsu tomak Centro Chega! nian ajuda ona uma ida ne’e. Vitima barak maibé ita bele hahú hamenus ona,”.
Reprezentante Veteranus Munisípiu Atauro, Vicente refórsa nu’udar veteranus iha Munisípiu Atauro apresia ba programa ida ne’e, ba oin presiza servisu hamutuk ho veteranus sira hodi rekoilla dadus sobrevivente sira ho di’ak.
Reprezentante Koordenadór Nasionál Asosiasaun Vitima Konflitu Polítiku 1974-1999, Nelson dos Santos haktuir, uma memória esperansa ne’ebé Asosiasaun Vitima hamutuk ho Centro Chega! entrega ba sobrevivente nu’udar maneira dignifikasaun no valorizasaun ba nia kontribuisaun luta ukun rasik-an.
Sobrevivente Faustino Barros Soares da Costa, agradese Centro Chega! no Asosiasaun Vitima tanba tulun ona nia liuhosi uma memória esperansa. Uma ida ne’e sai nu’udar mahon ba nia ho familia hodi hala’o atividade loron-loron nian.
Media Chega!
