Dili, 22 Jullu 2021, Diretór Centro Nacional Chega!I.P, Sr. Hugo Maria Fernandes hateten, Centro Chega! hamutuk ho TLSA (Timor-Leste Study Asosiation) husi Australia no Portugal iha tempu badaka sei organiza Simpóziu Internasionál ida hodi komemora tinan 30 ba akontesimentu Masakre Santa Cruz 12 Novembru 1991 – 2021.

Sr. Hugo haktuir, koordenasaun ne’ebe halo liu husi Konferensia Virtual ko’alia kona-ba programa sira ne’ebe sei hala’o iha Simpóziu Internasionál ne’e mak hanesan, diskusaun aberta, meza redonda, iha aprezenasaun rezultadu peskiza, lansamentu livru, iha ezibisaun fotografia no mós ezibisaun dokumentál. Simpóziu Internasionál ne’e sei halo husi meius Online.

Nia haktuir, iha fulan kotuk komesa dadauk lansa pedidu proposta peskiza nian no pedidu nota peskiza nian ba akademiku no peskizadór sira, no to’o iha loron 21 Jullu 2021, liu ema na’in 10 mak hatama ona pedidu peskiza. Peskizadór balun husi Timoroan no balun husi rai liur. Husi Timoroan ema na’in 2 no seluk husi Australia, Portugal no Amerika.

Peskiza ne’ebé peskizadór sira foku mak kona-ba Masakre Santa Cruz 12 Novembru ho nia pergunta sira mak hanesan; Tanbasá mak akontese Masakre Santa Cruz? no Oinsá mak Masakre Santa Cruz akontese?

Nia subliña, tuir ajenda ne’ebé komisaun prepara ona, sei konvida autór ba organiza manifestasaun 12 Novembru mak hanesan Sr. Constancio Pinto, Sr. Grigorio Saldanha, Sr. Max Stahl no Sra. Joana Dias.

Tuir planu Simpóziu Internasionál ne’e sei realiza iha Centro Chega! durante loron 2 hahú husi loron 9-10 Novembru 2021.