Dili- Centro Nacional Chega!I.P ho Sekretariu Estadu Formasaun Profesional e Empregu (SEFOPE) deklara sira iha ona komitmentu atu asina nota entendementu ka MoU (Memorandum of Undestanding).
Diretór Nasionál Relasaun Traballu, Francisco Tilman informa, SEFOPE iha komitmentu atu asina MoU (nota entendementu) ho Centro Chega! tanba SEFOPE iha programa formasaun no auto-empregu hodi oferese ba sobrevivente ho nia oan sira.
“Ohin Diretór Jerál delega ha’u mai iha ne’e, servisu ida ne’e importante no iha komitmentu ita bele halo nota entendementu entre Centro Chega! ho SEFOPE”, dehan Francisco ba Media Chega! hafoin remata enkontru regular Grupu Traballu Reparasaun Nasionál, iha Salaun Konferensia Centro Chega!, Antigu Comarca Balide, Dili, Kuarta-feira, (16 /02/ 2022).
Francisco haktuir, SEFOPE iha programa rua (2); – ida programa formasaun ne’e ko’alia kona-ba formasaun sira. Ita iha sentru formasaun sira iha munisipiu hanesan munispiu Covalima, Viqueuque no Dili. Alende mos SEFOPE halo kooperasaun di’ak ho sentru formasaun privadu sira bele enkaixa sobrevivente nia oan sira aprende hodi hasa’e koñesimentu. – rua programa auto-empregu ne’e ko’alia kona-ba apoiu grupu. Se sobrevivente ho nia oan sira mak halibur malu kria grupu halo proposta SEFOPE bele ajuda.
“Ita iha sentru formasaun iha Suai, Viqueque, Dili no ami servisu hamutuk ho Centru Formasaun privadu sira. Vitima nia oan sira mak hakarak kapasita sira nia skill ita bele enkaixa ba iha sentru formasaun. Se ita nia sobrevivente sira ne’ebé hakarak kria grupu bele halibur hamutuk, kria grupu hato’o proposta ba SEFOPE”, Diretór sujere.
Maibé importante mak Centro Chega! ho SEFOPE tenke kria liña komunikasuan di’ak atu nune’e ita nia kooperasaun ne’e la’o ho di’ak.
Hatan ba esplikasaun ne’e, Diretór Divizaun Solidairedadde Sosial (DSS), Nelson Agusto Seixas dehan, kooperasaun Centro Chega! ho SEFOPE ne’e importante tebes tanba haktuir rekomendasaun Chega! nian mensiona kona-ba oinsá mak sobrevivente ka vitima sira ne’ebé mak laiha skill bele tuir formasaun hodi hasa’e skill no abilidade atu bele hetan servisu no mos kria empregu ba nia-an atu hadia nia moris.
“Ida ne’e nesesita duni servisu Divizaun Solidairedadde Sosial (DSS)-Centro Chega! nian ba apoiu. Fulan ida ne’e ka fulan oin ita bele halo kooperasaun. Ita finaliza tiha nota konseitu ita deskute ho sira ita bele formaliza ona ita nia kooperasaun ho SEFOPE”, Diretór garante.
Tanba SEFOPE partisipa ona grupu traballu reparasaun nasionál hamutuk liña ministeriál sira seluk inklui sosiedade sivil sira. Entaun ho sira oinsá mak atu asegura servisu tékniku no operasionais ne’ebé la’o iha kraik ne’e atu la’o di’ak liu tan iha futuru.
Centro Nacional Chega!I.P, Da Memória à Esperança (Centro Chega!) hamri’ik nu’udar institutu públiku ida ne’ebé estabelese ho dekretu Lei no. 48/2016 no tutela direitamente ba Primeiru Ministru. Centro Chega! nia vizaun mak: “Sosiedade ida ne’ebé inkluzivu, la repete istória passadu nian, moris iha dame, no respeitu ba direitus umanu”. Centro Chega! nia misaun mak: “Harii sentru Pós-konflitu ne’ebé prezerva memória passadu nian hodi promove direitus no valór umanu, harii parseria nasionál no internasionál hodi reforsa rede servisu sira atu implementa rekomendasaun sira husi Relatóriu Final Comissão de Acolhimento, Verdade e Reconciliação (CAVR)-Chega! No Comissão da Verdade e Amizade (CVA) – Per Memoriam Ad Spem, sira ne’ebé relevante”.
Media Chega!
