Dili – (20 Janeiru 2022), Centro Nacional Chega!I.P liu hosi Divizaun Relasaun Externa Komunikasaun no Advokasia (DREKA) halo enkontru dahuluk iha tinan 2023, ho Prezidente atúal Komisaun Reguladora Arte Marsais (KRAM), Fernandos Antonio da Costa ho ekipa iha Salaun Dame, KRAM, Lecidere-Dili.
Objetivu enkontru ne’e atu deskute kona-ba asuntu kooperasaun entre instituisaun rua, avalia servisu sira ne’ebé instituisaun rua hala’o iha tinan 2022, no deskute mós kontinuasaun atividade prevensaun konflitu ne’ebé sei halo hamutuk iha tinan ida ne’e. Aproveita tempu hanesan, ekipa parebeniza Prezidente atúal KRAM ne’ebé hetan fiar hodi lidera KRAM ba mandatu tinan 4.
Diretór Divizaun Relasaun Externa Komunikasaun no Advokasia (DREKA), Gaudencio Soares Souza, lori Centro Chega! nia naran hato’o parabens ba Prezidente KRAM atúal ne’ebé hetan fiar husi Sekretariu Estadu Juventude no Desportu (SEJD) hodi lidera KRAM.
“Ami mai ennome Centro Chega! atu kongratula Prezidente foun Komisaun Reguladora Arte Marsais (KRAM), Fernandos Antonio da Costa ne’ebé hetan fiar,” dehan Diretór, Gaudencio.
Iha biban ne’e, Centro Chega! mós hato’o parabens ba KRAM tanba iha tinan 2022, servisu hamutuk ho Centro Chega! halo ona atividade hamutuk iha área prevensaun konflitu no identifika área sira ne’ebé sai risku ba konflitu.
Ho progresu servisu hirak ne’e, mak Centro Chega! iha komitmentu atu kontinua halo atividade hamutuk ba oin, tanba Centro Chega! hanoin katak, ita presiza halo atividade ne’e tanba liga ho rekomendasaun Chega! kona-ba paz, asegura seguransa ba komunidade sira nia moris.
“Hau hanoin atividade prevensaun konflitu ne’e ita kontinua tanba atu asegura nia sustentabilidade ba oin,” Diretór, Gaudencio realsa.
Iha oportunidade hanesan, Centro Chega! mós rekomenda ba KRAM atu formaliza kooperasaun liu hosi asina nota entendimentu (MoU) entre instituisaun rua, nune’e ba oin atu promove asuntu paz iha Timor-Leste.
Iha fatin hanesan, Prezidente atúal Komisaun Reguladora Arte Marsais (KRAM), Fernandos Antonio da Costa agradese ba ekipa Centro Chega! liuhusi DREKA ne’ebé halo ona enkontru ho sira hodi fartilla ona informasaun.
Ba oin KRAM ho Centro Chega! iha komitmentu atu hala’o atividade hamutuk ba asuntu prevensaun konflitu no deside ona atu estabelese kooperasaun liuhusi asina nota entendementu.
Media Chega!
