Ermera – Liu husi kooperasaun ne’ebé halo entre Centro Nacional Chega! no East Timor Caffe Intitution (ETCI) realiza ona kolókiu iha loron 18 Marsu 2020, hodi fahe informasaun kona-ba Relatóriu Chega! no Per Memoriam Ad Spem, iha Auditorium ETCI, iha Gleno – Ermera.
Kolókiu ne’e realiza ho intensaun fahe informasaun kona-ba Relatóriu Chega! no CVA ho nia rekomendasaun sira, inklui papél Centro Nacional Chega! ba Estudante Universitáriu sira ne’ebé hanesan jerasaun foin sa’e atu hatene.
Tuir Diretór Ezekutivu Centro Chega! Sr. Hugo Maria Fernandes katak, Jerasaun foin sa’e barak liu laiha konesaun emosianál ba luta Libertasaun Nasionál iha pasadu, nune’e kolókiu ida ne’e konsidera nu’udar oportunidade ida hodi koñese di’ak liu programa Centro Chega! nian ne’ebé mak relevante ho sira, hanesan programa transmisaun memória interjerasionál ne’ebé espesialmente foku ba atividade dokumenta inan-aman nia memória pasadu.
Diretór Centro Chega! kontinua enkoraja estudante sira atu haburas kultura hakerek, nune’e bele hakerek istória sira nia inan-aman ka familía sira, no bele haruka ba Centro Chega! hodi kompila iha livrinu sira, ne’ebé bele distribui ba ema hotu-hotu atu hatene.
Partisipa iha kolókiu ne’e, Estudante ETCI foun hirak ne’ebé tuir hela orientasaun akadémiku kuaze na’in 100, organiza ka fasilita hosi Divizaun Relasaun Externa, Komunikasaun no Advokasia (DREKA), Centro Nacional Chega!I.P.*
