Dili – (08 Novembru 2024), Diretór Ezekutivu Centro Nacional Chega!I.P, Hugo Maria Fernandes lori Centro Chega!I.P nia naran hato’o apresiasaun ba Asosiasaun Vítima Konflítu Polítiku 1974-1999 (AVKP) ba servisu parseria durante tinan-5 hatudu progresu di’ak.
Servisu kolaborasaun ne’e hatudu iha progresu implementasaun programa liu-liu programa reparativu durante tinan-5 hanesan; Apoiu pontual ba Sobrevivente hamutuk 333 kompostu mane 145 no feto 188, husi tinan 2021-2023. Sobrevivente nia oan hetan bolsa estudu hamutuk 25 kompostu mane 15 no feto 10, husi 2022-2024. Sobrevivente hetan Uma Memoria ba Esperansa (UMbE) hamutuk 20 kompostu mane 11 no feto 9, husi 2021-2024. Sobrevivente hetan asisténsia saúde mental hamutuk 91, rekuperadu 15 kompostu mane 9 no feto 6, husi 2021-2023. Programa reunifikasaun labarik hamutuk 59, husi 2017-2023 no programa eventu komemorativu hamutuk 64, husi 2017-2024.
“Centro Chega! apresia servisu Asosiasaun Vítima iha nivel nasionál no munisipiu sira, ba ita nia parseria durante tinan lima nia laran. Bele hateten katak servisu reparativu hotu-hotu ne’ebé mak Centro Chega!I.P halo lato’o iha kraik ne’ebá sem partisipasaun, kolaborasaun no atendementu ne’ebé di’ak husi asosiasaun Vítima”, Diretór Ezekutivu hato’o apresiasaun ne’e iha enkontru anual hamutuk Dirijente, Konsellu no Sekretariadu Ezekutivu Asosiasaun Vítima, iha salaun Sede Nasional Asosiasaun Kombatente no Veteranus Luta Libertasaun Nasional Timor-Leste (AKVLLN-TL), Bairo dos Grilhos, Dili.
Diretór hatutan, maske servisu hirak ne’e ita halo ona, maibé seidauk hotu tanba ida ne’e nu’udar misaun ida katak ita hotu nia servisu hamutuk oinsa Vítima no sobrevivente sira bele moris iha situasaun ida dignu. Ne’e mak objetivu boot ida, ne’e lafasil dalaruma ita iha vontade boot halo duni ida ne’e, maibé mos sirkunstansia barak ne’ebé mak ita hasoru dalaruma sai tiha impedementu ba ita nia servisu.
Ida ne’e mak karakter, nia esplika “ita involve ita nia-an ba servisu justisa tranzitóriu ne’e servisu ida naruk no kompleksu i depende tebes ba situasaun Polítika ne’ebé mak iha ita nia rai ne’e infrenta. Dalaruma ema hanoin justisa tranzitóriu ne’e hanesan tranzisaun administrasaun ne’ebé tinan ida ne’e tenke hotu ona, lae”.
Kompleksidade ida, nia esplika, oinsa mak responde ba vítima sira nia nesesidade no mos kompleksidade Polítika ne’ebé mak ita nia rai infrenta, dalaruma ita halo ho tempu ne’ebé naruk. Ida ne’e mak prosesu ida lafasil. Fo exemplu de’it husi tinan 2001 harii Comissão de Acolhimento, Verdade e Reconciliação (CAVR) no harii tan Comissão de Verdade e Amizade (CVA), durante tinan 10 servisu paradu, depois iha tinan 2017 harii Centro Chega!.
Ida ne’e hatudu katak, servisu ne’ebé ita halo depende ba vontade ne’ebé boot ho ita nia konsistensia atu implementa rekomendasaun sira husi relatóriu Chega! hamutuk 204.
Centro Chega! nu’udar instituisaun públiku sempre hasoru dezafiu, dezafiu ida mak orsamentu. Ita haree husi alokasaun Orsamentu Jeral Estadu (OJE) 2023 ba Centro Chega!I.P ho totál $ 1, 971,437.98. Durante ezekusaun Centro Chega! hetan 92%. Iha alokasaun Orsamentu Jeral Estadu (OJE) 2024 ho totál $ 1, 804,377.00. Durante ezekusaun to’o fulan Outobru 67,1%. Alokasaun Orsamentu Jeral Estadu (OJE) 2025 ba Centro Chega! ho totál 1,563,638.00. Ida ne’e hatudu katak ita hakarak halo servisu oinsa halo vítima no sobrevivente sira moris ho dignu, maibé alokasaun orsamentu tun.
Iha oportunidade hanesan, Koordenadór Nasional Asosiasaun Vítima Konflítu Polítiku 1974-1999 (AVKP), Domingos P. de Araujo Moniz agradese Centro Nasional Chega!I.P ne’ebé durante tinan-5 fo apoiu, maske iha dezafius barak nafatin iha komitmentu atu hametin liu tan kooperasaun.
Nia esplika, liu husi enkontru anual ne’e bele hamutuk ho Dirijente, Konsellu no Sekretariadu Ezekutivu Asosiasaun Vítima atu fo hanoin ba malu hodi hasoru dezafiu foun ne’ebé sei mai.
Enkuantu, atividade enkontru ne’e realiza tanba hetan apoiu husi Gabinete Apoiu Sosiedade Sivil (GASC) no partisipa husi direjente Asosiasaun Vítima munisipiu sira.
(Media CNC)
