Dili – Atu halo balansu ba narativu istória mak Centro Nacional Chega! organiza ona workshop ida kona-ba Metodolójia Peskiza Istória Komunidade, ne’ebé hala’o iha Salaun Konferénsia Centro Chega!, iha Antigo Comarca Balide – Dili, loron 28 Jullu 2020.
Diretór Ezekutivu Centro Nacional Chega! Sr. Hugo Maria Fernandes iha abertura hateten, Peskiza kona-ba istória Komunidade nia objetivu mak Dokumenta memória koletiva iha nivel suku nian hodi eleva partisipasaun populár intermus halo balansu ba narativu istóri, nune’e bele hakotu divizionizmu rejionál no lori ema hotu ba rekonsiliasaun.
Diretór Ezekutivu hato’o katak durante ne’e iha dezekilibru ba narativu istória, nune’e Centro Chega! halo ona programa peskiza istória komunidade ne’ebe implementa ona nu’udar programa pilotu iha suku haat (4) mak hanesan Suku Motael, Suku Kolmera, Suku Bairo-pite no Suku Comoro. Programa ne’e bele hamosu maneira ka forma metodolojia foun hodi dokumenta no hakerek memória koletiva ema nian.
Iha sesaun aprezentasaun materia ba partisipante sira, Fasilitatór (mentór) ba programa peskíza Istória komunidade Dr. Aniceto Guro Berteni Neves afirma tan katak objetivu diskusaun sira iha workshop ne’e sei hamosu matadalan ba peskizadór Istória Komunidade ne’ebé kabe ba mandatu Centro Nacional Chega! nian kona-ba prezervasaun memória pasadu.
Partisipante sira iha Workshop ne’e mak Dosente sira husi UNTL, UNDIL, UNPAZ, UNITAL, Estudante Finalista sira husi Universidade no Funsionàriu Centro Nacional Chega!
