Sr. Augusto Jr. Miclat husi nasaun Filipina nu’udar Diretór Ezekutivu no Fundadór Initiatives for International Dialogue (IID), organizasaun advokasia, prevensaun konflitu no solidariedade husi Filipina ne’ebé hala’o kampaña no programa-sira kona-ba dame no demokrásia iha rejiaun Sudeste Aziátiku no partikularmente iha Burma/ Myanmar, Mindanau, Tailandia Súl no mós inísia programa-sira iha Timor-Leste, Aceh no West Papua. Sr. Gus Miclat nu’udar koordenadór Asia Pasific Coalition for East Timor (APECT) iha 1994 to’o Timor-Leste hetan Independénsia iha 2002.

Iha prosesu dame iha Mindanau, Sr. Gus Miclat hamutuk ho organizasaun sosiedade sívil sira seluk, estabelese rede koligasaun entre entidade oin-oin iha Mindanau Peoples Caucus (MPC) hanesan Bantay Ceasefire (Ceasefire Watch), Mindanau Peace Weavers (MPW) and Friends of Bangsamoro (FoBM). Sr. Gus Miclat mós organiza movimentu All-Out Peace (AOP). Movimentu ne’e, ho nia objetivu mak atu kontra masakre Mamasapano iha Janeiru 2015. MPW no AOP kontinua involve iha prosesu dame iha Mindanau. Iha 2019 Sr. Gus Miclat lidera delegasaun husi Bangsamoro (Mindanau) mai vizita Timor-Leste hodi aprende kona-ba tranzisaun polítika, justisa transitóriu no mos movimentu solidariedade. Agora dadaun Sr. Gus Miclat nu’udar Membru Konsellu Asesoria Internasional (KAI) Centro Nacional Chega!I.P ba periodu 2023-2026.