Lautém – (24 Outobru 2026), Prezidente Republika (PR), José Ramos Horta ofisialmente abertura semináriu no diálogu kona-ba Prosesu Rekonsiliasaun Timoroan (PRT), ne’ebé hala’o iha Suku Com, Postu Administrativu Lautém, Munisipiu Lautém, iha ámbitu Festival Fronteira 2026 ba dala-4 ho tema “Interkambiu Kultural ba Hametin Rekonsiliasaun”, ho nia subtema “Hau nia Rai, Hau Nia Tasi, Hau Nia Kultura”.

Iha abertura, Prezidente Republika hato’o apresiasaun no destaka apoiu politika estadu nian liu husi Centro Chega!I.P atu fasilita prosesu rekonsiliasaun Timoroan sira ne’ebé hakarak halo rekonsiliasaun no dame malu.

“Sira ne’ebé hakarak halo rekonsiliasaun ko’alia ba malu ba, iha instituisaun ida ne’ebé matenek servisu di’ak tinan sira nia laran ne’e bele ajuda. Hau entrega ona ba estadu kleur ona”, dehan Prezidente iha diskursu abertura semináriu no diálogu iha ámbitu atividade Festival Fronteira 2026 ne’ebé organiza husi Centro Nacional Chega!I.P, Sekretariu Estadu Arte no Kultura (SEAK), Ministeriu Administrasaun Estatal (MAE), Prezidente Autoridade Munisipu Lautém no Gabinete Fronteira Terestre no Maritima (GFTM).

Diretór Ezekutivu Centro Nacional Chega!I.P, Hugo Maria Fernandes, sente onradu no orgullu tanba Prezidente Republika marka prezensa no halo abertura ba semináriu no diálogu ne’e. “Hau hanoin ita nia atividade hetan apresiasaun di’ak husi Prezidente Republika, halo introdusaun breve nu’udar Prezidente Republika saida mak estadu nia vizaun. Klaru iha buat ne’ebé ita ko’alia orsida iha relasaun ho saida mak Prezidente ko’alia”, Diretór esplika.

Hafoin remata abertura, parte dader halo aprezensaun ho oradór sira mak hanesan, Lia-Na’in Suku Maulau, Antonio Salsinha, Xefe Suku Kasabauk, Francisco Cardoso no Xefe Suku Mauchiga, Abrão de Araújo, ne’ebé modera husi José Luis de Oliveira. Iha parte lokraik kontinua halo aprezentasaun ho oradór sira mak hanesan, Konsultór, Fernando Lekinawa da Costa, Portavoz GT-PRT, José Neves Samalarua, no Firetór Chega!, Hugo Maria Fernandes

Atividade semináriu no diálogu ne’e ensera husi Provedór Direitus Umanus no Justisa (PDHJ), Virgilio da Silva Guterres “Lamukan”. Enkuantu atividade hahu husi dader to’o lokraik la’o ho di’ak no susesu.

Media Chega!.