Díli – (25 Abril 2024), Eis Primeiru Ministru (PM), Dr. Marí Bim Amude Alkatiri husu ba joven timoroan sira iha rai laran no mos rai liur presiza aprende, hatene no koñese ninia istória luta ba Independénsia.
Nia hatutan, tanba Independénsia ne’ebé ita hetan la’os ema entrega de’it mai ita, maibé ita luta ho sakrifisiu boot ema barak lakon vida, lakon família no lakon sasan tanba defende liafuan mate ka moris ukun rasik-an.
“Ha’u husu ba joven sira atu hanoin didi’ak buat ida ne’e. Luta ida ne’e halo ho sakrifisiu boot, ha’u mak hateten iha ne’e agora,” dehan Eis Primeiru Ministru (PM), Marí Bim Amude Alkatiri iha diskursu iha Konferensia Nasionál ho tema “Tinan 50 Momentu Istóriku 25 Abríl Refleksaun kona-ba Deskolonizasaun iha Timor-Leste 1974-1975”. Konferensia ne’e realiza iha ámbitu komemorasaun tinan 50 Revolução dos Cravos, organiza husi Centro Chega!, ne’ebé realiza iha Salaun Konferensia Centro Chega!, Antigo Comarca Balide-Dili.
Ho sakrifisiu ne’e, nia afirma, “Joven sira presiza koñese istória. Istória ne’e importante, istória ne’e tenke istória reál. Ita bele iha ida-idak nia memória, maibé tratamentu atu sai istória ne’e la’os ita mak halo, ne’e istoriadór sira mak sei halo tratamentu”.
Iha oportunidade hanesan, Diretór Ezekutivu Centro Nacional Chega! Instituto Publiku (CNC I.P), Hugo Maria Fernandes argumenta, Timor-Leste iha dezafiu boot kona-ba istória. Dezafiu mak joven sira nu’udar jerasaun kontinuadór sai apatia ba ita nia istória pasadu.
Ne’e mak problema reál ne’ebé akontese iha sosiedade. Problema ida ne’e akontese, ita labele fo sala ba sira, problema mak ita nia istória laintroduz sistematikamente iha ita nia Kurikulun Ensinu tanba ita nia polítika edukasaun lafo oportunidade atu hamosu narativa oin-oin, prespetiva oin-oin kona-ba istória Timor nian.
Problema seluk mak, iha Ensinu Sekundaria ita nia estudante sira aprende istória husi Nasaun Europa nian husi sékulu 16, 17, 18 to’o 19. Agora ita nia Ensinu Sekundaria no Tekniku Vokasional sira laiha materia istória Timor-Leste. Ida ne’e hatudu katak, ita iha problema ne’ebé seriu, ita presiza hamutuk atu rezolve.
Diretór Hugo akresenta katak, “Preokupasaun ida ne’e hau hakarak fahe ho ita boot sira iha ne’e, atu bele ajuda Centro Chega!, ajuda Ministériu Edukasaun, ajuda Governu re-define polítika edukasaun Timor nian atu harii sosiedade ida ne’ebé?. Hau fiar ita hotu hakarak harii sosiedade ida ne’ebé orgullu ser timorense ho identidade ida. Hau fiar, husi Comarca Ai-funan sei buras”.
(Media CNC)
