Manatuto, (14 Jullu 2025) – Nuno Governu Konstitusionál liu husi Vise Ministru Asuntu Parlamentar (VMAP), Aderito Hugo da Costa ho Prezidente Konsellu Administrasaun Centro Nacional Chega!I.P, Manuel Pereira hamutuk ho autoridade no parseiru sira halo lansamentu fatuk dahuluk ba konstrusaun Uma Memória ba Esperansa (UMbE) 6 ne’ebé Centro Chega!I.P konstrui iha tinan 2025.

UMbE ne’ebé lansa iha Suku Kairui, Postu Administrativu Laleia, Munisípiu Manatuto ba sobrevivente, Irenie Bi-bui Fatima de Sousa nu’udar simbolu reprezentasaun lansamentu ba UMbE sira seluk ne’ebé sei konstrui iha Munisípiu.

Sobrevivente sira hanesan, Francisco Vital Ximenes, Suku Buibau, Postu Administrativu Baucau Vila, Munisípiu Baucau, Ana Freitas, Suku Uailili, Postu Administrativu Baucau Vila, Munisípiu Baucau, Ana G. de Lima S. Lemos Almeida, Suku Soro, Postu Administrativu Ainaro, Munisípiu Ainaro, Agata da Silva, Suku Berloic, Postu Administrativu Alas, Munisípiu Manufahi, Alexandrino da Costa, Suku Fatukahi, Postu Administrativu Fatuberliu, Munisípiu Manufahi. Inklui Irenie Bi-bui Fatima de Sousa, Suku Kairui, Postu Administrativu Laleia, Munisípiu Manatuto.

Centro Chega!I.P harii uma 6 ba sobrevivente hirak ne’e tanba moris ho kondisaun vulneravel liu tanba kauza husi konflítu pasadu 1974-1999 ho objetivu atu dignifika no valoriza sira nia kontribuisaun luta ba ukun rasik-an.

UMbE 6 ne’ebé harii ho medida 9×7, kompostu husi, Kuartu 3, sala 1, haris fatin 1, varanda 1 no mos dapur, kompleta ho instalasaun eletrisidade, plafon no keramik, exeptu dapur ho totál kustu mais ou menus $ 14.800 to’o $ 17.000, depende ba distansia transportansaun material uma nian. Osan sira ne’e inklui ona selu badae. Implementadór projetu mak Asosiasaun Vítima Konflítu Politiku 1974-1999 nu’udar mos parseiru Centro Chega!I.P nian.

Iha biban ne’e, Vise Ministru Asuntu Parlamentar (VMAP), Aderito Hugo da Costa esplika, Uma Memória ba Esperansa ne’ebé Centro Chega!I.P halo nu’udar obra estadu nian tanba faz parte husi rekomendasaun relatóriu Comissão de Acolhimento, Verdade e Reconciliação (CAVR) no Comissão Verdade e Amizade (CVA) nian ne’ebé ko’alia kona-ba programa reparasaun. Centro Chega!I.P nu’udar ajensia espesializadu ne’ebé tau matan ba vítima no sobrevivente sira ne’ebé sofre ba funu tanba kauza husi ukun rasik-an. Tanba ne’e, hanesan Vise Ministru Asuntu Parlamentar (VMAP) fo hanoin katak, tinan oin, numeru UMbE ba sobrevivente sira sei aumenta.

Reprezenta Membru Konsellu Administrasaun Centro Chega!, Inocêncio de Jesus Xavier hateten, vítima nu’udar sentru ba servisu Centro Chega!I.P nian. Iha tinan kotuk halo ona UMbE hamutuk 20 no tinan ida ne’e sei halo tan uma 6. Maske vítima no sobrevivente sira barak presiza, maibé problema orsamentu, sei halo tuir kbiit ne’ebé Chega! iha.

Sobrevivente na’in 6 ne’ebé hetan UMbE merese duni tanba sira moris ho kondisaun ida vulneravel liu. Centro Chega!I.P agradese ba entidade sira hotu nia servisu hamutuk, ohin halo lansamentu fatuk dahuluk UMbE ba sobrevivente Irenie ho nia maluk sira seluk. Centro Chega!I.P husu mos autoridade lokál liu-liu Xefe Suku, Xefe Aldeia no komunidade sira nia apoiu bele aselera projetu ne’e tuir tempu ne’ebé determina.

Media Chega!.