Díli – (17 Jullu 2025), Vise Ministru Asuntu Parlamentar (VMAP) reprezenta Primeiru Ministru (PM) no Ministru Prezidensia Konsellu Ministru (MPCM) hato’o apresiasaun a’as ba servisu Membru Konsellu Administrasaun, Estrutura Ezekutivu no funionáriu tomak Centro Chega!I.P nian, ne’ebé hatudu kreatividade no produtividade servisu durante loron 8 nia laran.
Apresiasaun ne’e, Vise Ministru hato’o, iha serimonia enseramentu selebrasaun aniversáriu Centro Chega!I.P ba dala-8 no Festival Kultura Rezisténsia Populár (FKRP) ne’ebé realiza iha Portu Díli, Sexta-feira, (17 Jullu 2025).
Vise Ministru hato’o apresiasaun, tanba haree ba sekuensia atividade sira ne’ebé hala’o iha ámbitu selebrasaun no festival nian hanesan, seminariu, lansamentu livru, diskusaun panel kona-ba memória koletiva no rekonsiliasaun, lansamentu relatóriu annual 2024, asina kontratu ho estudante subsidiu estudu, asina nota de entendimentu ho koperasaun Fransa, lansamentu mural painting, book talk, feira livru, ezibisaun fotografia, projesaun film rekonsiliasaun, arte ba labarik, live musik, misa agradesimentu no seluk tan.
Atividade hirak ne’e dezeña ho kapas, VMAP esplika, ida ne’e “motiva tan ami atu hanoin tan katak espasu ida iha Chega! ne’e, espasu ida mais apropriadu husi timoroan sira feto no mane sira nia kreatividade, sira nia produtividade, sira nia matenek tomak bele lori instituisaun estadu nian ida ne’e lori to’o iha nivel ida agora”.
Enome governu, rekomenda ba Konsellu Administrasaun, Estrutra Ezekutivu no funsionáriu sira kontinua hamosu ideais kreativa sira tanba estadu harii Chega! hodi prezerva memória hodi mos prozeta esperansa rai no nasaun ida ne’e ba oin ho di’ak ho kuidadu.
Iha biba ne’e, Diretór Ezekutivu Centro Nacional Chega!I.P, Hugo Maria Fernandes esplika, Centro Chega!I.P ezisténsia ba tinan 8, servisu direitamente ho Primeiru Ministru (PM) 4, hahu husi Dr. Rui Maria de Araujo, Dr. Mari Bin Amude Alkatiri, Sr. Taur Matan Ruak no Sr. Kayrala Xanana Gusmão, ami sente orgullu nu’udar timoroan tanba servisu direitamente ho lider timoroan sira nian.
Diretór Ezekutivu, lori Centro Chega!I.P nia naran hato’o agradesimentu espsial ba instituisaun governu, organizasaun rezistensia juvenil, organizasaun sosiedade sivil no grupu sira ne’ebé mak partisipa ona iha atividade Centro Chega!I.P nian, iha ambitu selebrasaun aniversáriu Centro Chega!I.P ba dala-8 no Festival Kultura Rezisténsia Populár (FKRP) nian, ba ita boot sira nia partisipasaun lori susesu ba eventu ida ne’e, ate hasoru malu iha tinan oin.
Media Chega!.
