Manatuto, (19 Setembru 2025) – Vise Ministru ba Asuntu Parlamentar (VMAP) Adérito Hugo da Costa hamutuk ho Sekretariu Estadu Komunikasaun Sosial (SEKomS), Expedito Dias Ximenes, Diretór Ezekutivu Centro Nacional Chega!I.P, Hugo Maria Fernandes, Autoridade Munisipiu Manatuto no mos Asosiasaun Vitima Konflitu Politiku 1974-1999 (AVKP) entrega Uma Memória ba Esperansa (UMbE) ba Sobrevivente, Irenie Bi-Bui Fatima de Sousa, iha Suku Kairui, Postu Administrativu Laleia, Munisipiu Manatuto.
Objetivivu entrega UMbE ba Sobrevivente Irenie, atu valoriza no dignifika nia kontribuisaun luta ba ukun rasik-an. No mos nu’udar asaun implementasaun rekomendasaun Chega! kona-ba “Reparasaun ba Vitima”.
Vise Ministru Asuntu Parlamentar (VMAP), Aderito Hugo da Costa esplika, uma ne’ebé entrega ba Sobrevivente Irenie nu’udar jestu solidariedade estadu nian. “Hodi Ministériu, Konsellu Ministru nia naran, ami agradese ba CNC ho Komisariu sira hotu ho ekipa tomak CNC nian. Estadu no governu nafatin imi nia dedikasaun ho rekursu ne’ebé mak imi iha lori nafatin esforsu no mehi koletivu estadu nian atu fo atensaun ba problema ne’ebé ita nia povu infrenta”.
Diretór Ezekutivu Centro Nacional Chega!I.P, Hugo Maria Fernandes dehan, Sobrevivente Irenie merese hetan UMbE tanba UMbE reprezenta memória tomak Irenie nia kontribuisaun ba prosesu luta ukun rasik-an. Uma ne’e entrega nu’udar rekoñesimentu ida Sobrevivente sira.
Sekretariu Estadu Komunikasaun Sosial (SEKomS), Expedito Dias Ximenes, nu’udar Laleia oan agradese IX Governu Konstitusional tanba halo ona uma ba Sobrevivente Irene. Uma ne’e governu halo nu’udar simbolu rekoñesimentu ba Laleia oan sira nia kontribuisaun luta ba independénsia.
Koodenadór Nasional Asosiasaun Vitima Konflitu Politiku 1974-1999 (AVKP), Domingos P. de Araujo Moniz rekoñese katak, estadu liu hosi Governu komesa tau matan ona ba vitima no sobrevivente sira maske seidauk responde hotu, maibé neineik sei to’o.
Lori Asosiasaun Vitima nia naran hato’o agradesimentu ba governu liu hosi Centro Chega!I.P ne’ebé halo ona uma ba Sobrevivente sira. Ida ne’e hatudu responsabilidade governu nian hodi kontinua tau matan sira ne’ebé moris mais vulneravel.
Sobrevivente, Irenie nu’udar benefisiaria ba UMbE, hato’o obrigado wain ba IX Governu Konstitusional liu hosi Centro Chega!I.P ne’ebé halo ona uma hodi sai mahon ba nia ho familia.
UMbE ne’ebé entrega tanba nia nu’udar Vitima ba Violasaun Direitus Umanus Pasadu no agora sai defisiensia fiziku. Uma ho medida 63m³, kompostu hosi kuartu 3, haris fatin 1, sala vizita I, no dapur iha parte liur ho medida 7.5m.
Tuir dadus Centro Chega!I.P liu hosi Divizaun Solidariedade ba Reparasaun (DSR) rejistu katak, husi 2021 to’o 2025, Centro Chega!I.P entrega ona Uma Memoria ba Esperansa (UMbE) ba sobrevivente mais vulneravel hamutuk 20.
Media Chega!.
