Sítiu Istóriku Masakre Mohunumou lokaliza iha Suku Maubisse, Postu Administrativu Maubisse, Munisípiu Ainaro. Fatin Masakre ne’e, agora dadaun okupa husi komunidade sira. Fatin Mohunumou konsideradu nu’udar Sítiu Istóriku ida tanba liu tiha invazaun boot ne’ebé akontese iha loron 7 Dezembru 1975, iha loron 27 Dezembru FRETILIN sees husi nia base iha Aisirimou, Munisípiu Aileu hodi la’o ba diresaun Maubisse tanba militár Indonézia sira komesa hakbesik-an ona ba Aileu.
Bainhira sira sai husi Aileu sira mos evakua dadur entre na’in 300 to’o 400 ne’ebé antes ne’e dadur iha Aileu. Hafoin to’o iha Maubisse iha loron 28 Dezembru, iha tempu kalan, militante no kuadru FRETILIN sira lori dadur grupu ida, inklui Major Lorenço (Lider UDT nian husi SAME), Amadio Coelho (Jerente Pousada Maibisse iha momentu ne’ebá), Celestino ho Manuel Belo husi Baucau, Jacques Pan ho xineza ida ne’ebé la konsege identifika nia identidade, hodi ba oho iha Traveissa Turiscai nian ne’ebé koñesidu ho Masakre Mohunumou.
