Dili – Diretór Ezekutivu Centro Nacional Chega!I.P Hugo Maria Fernandes hamutuk ho Ekipa halo ona audiésia ho Vise Primeiru-Ministu hanesan mós Ministru Planu no Ordenamentu José Maria dos Reis, hodi ko’alia kona-ba integrasaun Rekomendasaun sira husi Relatóriu Chega! no Per Memoriam Ad Spem (PMAS) iha Reajustamentu Planu Estratéjiku Dezenvolvimentu Nasionál 2011 – 2030, tanba Vise-PM mak lidera Ekipa Reajustamentu PED ne’e.

Iha Audiénsia ne’ebé hala’o iha Sala Enkontru Gabinete Vise Primeiru Ministru Hudi-Laran, Dili, iha loron 30 Setembru 2021, Diretór Ezekutivu esplika katak, atualmente Planu Estratéjiku Dezenvolvimentu la iha referénsia ruma ba Relatóriu Chega! no iha parte kiik de’it mak mensiona kona-ba rekonsiliasaun, maske PED ne’e foin elabora ikus, enkuantu Relatóriu Chega! no PMAS entrega uluk ona ba Estadu Timor-Leste no Indonézia iha tinan sira antes, no Relatóriu Chega! no PMAS husu ba Estadu Timor-Leste no Indonézia atu bele implementa Rekomendasaun sira husi Relatóriu rua.

Diretór Hugo esplika katak, Rekomendasaun Chega! ne’ebé hamutuk 204 no Rekomendasaun Relatóriu PMAS hamutuk 20-resin kasifikadu ba parte boot importante 7 ne’ebé Estadu no Governu Timor-Leste atu implementa mak hanesan: Direitus Umanus, Integrasaun Materia Chega! iha Kurikulu Edukasaun no Materia Formasaun ba PNTL no F-FDTL, Prezerva Memória Pasadu, Apoiu ba Sobrevivente ho Karakter Reparasaun, Rekonsiliasaun, Reforma Institusionál no Fahe Esperiénsia Timor-Leste ba Rai Liur.

Ho nune’e, Tuir Diretór Ezekutivu Centro Chega!, ida ne’e sai hanesan momentu ida ne’ebé di’ak no importante atu bele ajusta Rekomendasaun sira husi Relatóriu Chega! no PMAS ba iha Planu Estratéjiku Dezenvolvimentu (PED) 2011 – 2030

Relasiona ho kestaun sira ne’ebé hato’o husi Diretór Ezekutivu Chega! ho ekipa, Vise Primeiru-Ministru hateten, nia parte apresia ho vizita husi Centro Chega! no afirma katak, importante atu konsidera ba prosesu reajustamentu PED ne’ebe hala’o hela ho Rekomendasaun sira husi Relatóriu Chega! no PMAS.

Vise PM hateten, Centro Chega! bele sai parseiru ba Komisaun Reajustamentu Planu Estratéjiku Dezenvolvimentu, nune’e bele halo balansu ba dimensaun tolu hanesan: Planeta no Rai, Dimensaun Povu no Dimensaun Paz, no Centro Chega! bele kontribui iha Dimesanun Paz.

Enkontru ne’e termina ho entrega Planu Estratéjia Centro Chega! ‪2021-2025 husi Diretór Ezekutivu Chega! Hugo Maria Fernandes ba Vise Primeiru Ministru José Maria dos Reis.