Mai Ita Hatene Rafael Maria de Jesus Correa “Matako’i” Nia Istória Pasadu Durante Konflitu Politiku (1975-1999) Liu Husi Programa Hatutan Memoria.
Iha publikasaun ida ne’e ami fahe informasaun ba maluk sira kona-ba istória Rafael Maria de Jesus Correa “Matako’i” Moris iha loron 10 fulan-Fevereiru tinan 1981.
Hau komesa envolve luta iha tinan 1996. Momentu ne’ebá, maske sei minoridade, hau komesa envolve iha serbisu polítika tanba hau-nia pai rasik, Tobias Alves Correia (Matebian), mak sai hanesan Sekretariu Nurep. Hau sai hanesan pesoál ba Seksaun Informasaun no Lojístika. Hau-nia serbisu prinsipál iha momentu ne’ebá mak halibur no kompra sasan nesesária sira ne’ebé FALINTIL sira presiza hodi lori ba FALINTIL sira.
Sasan ne’ebé hau sosa dalabarak mak hanesan masin-midar, foos no pilox ne’ené mak atu hadiak ka pinta kilat. Ho serbisu hirak-ne’e, iha tinan 1999, tanba la seguru ona hau mos halai tama ba Igreja Likisá hodi subar. Iha-ne’ebá, bainhira milísia no BRIMOB halo asaltu ba Igreja Likisá, hau hetan tiru iha liman karuk to’o borus. Sira kaptura no lori hau primeiru ba KODIM depois ba KORAMIL. Detein hau iha-ne’ebá durante fulan tolu.
Durante detensaun ne’e hau hetan torturasaun maka’as, sira baku hau no tara hau. Hau nia oin no matan sira bubu hotu. Liu tiha ida-ne’e, hau ho hau-nia maun ida naran António da Cruz halai subar ba iha foho no kontinua serbisu hanesan uluk ate ukun an maske aman ne’ebé orienta laiha ona.
Husi: Bonifacio de Lisboa Oliveira, Membru ASEMUL.
