Komisaun Organizadora Loron Konsulta Popular ba Tinan 20, liu hosi Centro Nacional Chega!I.P realiza Kompetisaun Koral Muzika Rezistensia, hodi promove no hametin sentidu nasionalismu no patriotismu ba jerasaun foun sira. Promosaun hakotu iha kompetisaun deit?
Pergunta ida neé sai mos preoukupasaun ba konkorentis kompetisaun koral muzika rezistensia refere.
Membru Movimentu Grupu Koral Santa Cecilia Gabriela Soares do Carmo espera atividade refere bele realiza bebeik nomos halao iha Munisipiu sira hodi promove diak liu tan muzika rezistensia.
Hatan be preokupasaun neé, Director Executivo Centro Nacional Chega!I.P (Centro Chega!) Hugo Maria Fernandes, nudar mos Koordenador Seksaun Programa Komisaun Organizador Konsulta Popular, iha ninia intervensaun momentu halo abertura ba kompetisaun koral muzika rezistensia, iha Centro Convencao de Dili (CCD), Sabado (03/08) esklarese katak Centro Chega! halo ona koordenasaun ho Ministeriu Edukasaun, Juventude no Desportu (MEJD) hodi promove muzika rezistensia.
“Iha tinan ida neé Centro Chega! koordena ho Ministeriu Edukasaun, Juventude no Desportu hodi promove muzika rezistensia, liu hosi hanorin iha eskola sira. Espera bele inklui iha kurikulu edukasaun nian, alem de istoria,” Hugo salienta.
Iha tempu okupasaun Indonesia, ami hirak neébe eskola iha tempu neéba hatene hananu Garuda Pancasila, Padamu Negeri, Indonesia Raya no sel-seluk tan. Agora dadaun, hau husu deit ba hau nia oan nain tolu konaba muzika rezistensia, sira la hatene. Ida neé sai preokupasaun bot ba ita hotu, Hugo hatutan.
Entretantu Koodenador Unidade Pesquiza no Dokumentasaun Istoriku Aventino Ximenes, iha ninia serbisu fatin, Antigo Comarca Balide, Dili (05/08), ba TAFARA.TL afirma katak Centro Chega! estabelese ona Nota Intendimentu ho MEJD hodi hanorin istoria, inklui promove muzika rezistensia iha eskola.
“Centro Chega! estabelese ona nota intendimentu ho MEJD para hanorin istoria passadu mak kontempla iha Relatoriu CAVR Chega! no Relatoriu CVA Per Memoriam Ad Spem, inklui muzika rezistensia popular,” Aventino afirma.
Alem de isso, Aventino mos hatoó katak atraves kompetisaun muzika rezistensia neé sei selesiona grupu 10 melhor no muzika 10 para halo gravasaun, hodi distribui ba eskola sira, nomos ba publiku.
“Rezultadu hosi kompetisaun ida neé, grupu ida neébe selesiona nudar primeiru lugar, Centro Chega! serbisu hamutuk ho grupu koral refere hodi halo gravasaun ba muzika rezistensia 10, no ninia rezultadu hosi gravasaun entrega ba MEJD atu bele sai materia edukativu ba estudantes sira,” Aventino hatutan.
Nolasco Mendes, nudar Pesquizador Senior Centro Chega! aumenta, muzika rezistensia popular sanulu neébe sei halo gravasaun mak Oras Toó Ona hosi Lahane Group; Lemorai, kompozitor Vitorino/Zeto no populariza hosi Grupu Lemorai (Vitorino, Zeto, Amandio, Quito); Nonoi Murak hosi Agostinho Moniz; Liu Tinan Atus Hat, Kompozitor mak Sahe, populariza hosi Grupu Kultural Komite 28 Novembro/FRETILIN; Tansa La Dame, kompozitor Chico Ramelau, populariza hosi Quito Sousa; Por Ti Timor, hosi Nelson Turquel; Rai Timor Lorosaé, kompozitor Filipe Aranhado no populariza hosi Zinha Correia; Tahu Tempe hosi Pedro Madeira; Tanba Riku-Soin, kompozitor mak Quito Belo, populariza Zinha Correia; O Rai Timor, kompozitor Leo Moniz, populariza hosi Grupu Nail.* (Sandra Moniz & Metodio Caetano Moniz | TAFARA.TL | 05.08.2019).
Nutisia neé publika ona iha sitiu tafara.tl, edisaun 5 de Agosto de 2019.
