Dili – Diretór Centro Nacional Chega! Sr. Hugo Maria Fernandes, iha loron 29 Outubru 2020 sai hanesan oradór iha Semináriu Nacional ne’ebé organiza husi Programa Nasional Dezenvolvimentu Suku (PNDS) iha Ministériu Administrasaun Estatal (MAE) kona-ba “Konsulta Públiku ba Definisaun Ema Ki’ak no Kbiit Laek Tuir Konseitu Timor-Leste”. Debate públiku ne’e realiza iha Salaun Konferénsia Centro Chega! Antigo Comarca Balide – Dili, ne’ebé partisipa mós husi Ministru Administrasaun Estatal Sr. Miguel Pereira de Carvalho no Vise-Ministru MAE Lino de Jesus Terrezão, inklui peritu sira husi Ministériu Solidariedade Sosiál no Inkluzaun, Ministériu Saúde, Akademista, Sosiedade Sivíl no Funsionáriu sira husi MAE.
S.E Ministru Miguel de Carvalho iha nia intervensaun hateten, semináriu ne’e importante tanba peritu sira husi parte oi-oin bele partilla ideia ne’ebé di’ak liu atu implementa Programa Harii Uma ba Povu Kbiit Laek, nune’e bele garante povu moris iha kondisaun di’ak, ohin no ba futuru.
Entretantu, Diretór Ezekutivu Centro Chega! Sr. Hugo Maria Fernandés hateten, programa dezenvolvimentu sira ne’ebé governu trasa labele haree de’it ba futuru, maibé tenke reflete mós kondisaun sira ne’ebé povu hasoru iha pasadu, katak iha Timoroan barak mak moris vuneravel liu tanba sai vítima iha luta ba libertasaun nasional, ne’ebé to’o agora Estadu latau matan.
Tuir Hugo Fernandes, programa sira ne’ebé trasa labele ho intensaun atu hetan apoiu iha futuru governasaun, maibé tenke oferese duni ba sira ne’ebé vuneravel liu no presiza tebes apoiu husi governu.
Nia hatutan, objetivu sira husi programa hakbiit mak; atu dignifika ema sira ne’ebé fó sira nia moris no ema sira mak hetan sofrementu oin-oin no sai vulneravel tanba konflitu pasadu nian, dezenvolve memoriál no fó esperansa ba moris liu hosi aprende ho akontesementu signifikativu sira ne’ebé akontese durante funu nia laran no haburas edukasaun valór direitus umanus no valoriza luta ukun rasik-an nian. Alende ne’e, promove mudansa polítika (kebijakan), sosiál, ekonomia no seguransa, no hadia kondisaun moris hosi sobrevivente ne’ebé mak vulneravel liu.
Diretór Ezekutivu Centro Chega! ne’e afirma, Konseitu – Vulnerabilidade “ Programa REPARASAUN – Hakbiit haree liliu atu benefisia vítima/sobrevivente sira ne’ebé vulneravel liu – ne’ebé mak terus nafatin tanba Konsekuénsia husi Violasaun Direitus Umanus grave, ne’ebe akontese iha periodu Konflitu Polítiku hosi 24 Abríl 1974 to’o 25 Outubru 1999 nia laran”.
