Díli – Pakote Chega! Tour nu’udar programa foun ida husi atividade emprezariál Centro Nacional Chega!I.P nian. Programa ne’e halo tiha ona lansamentu hosi Sekretaria Estadu ba Igualdade no Inkluzaun (SEII), Maria do Rosário Fátima Correia, iha ambitu selebrasaun Aniversariu Centro Chega! ba Dala-V ho tema, “Justisa Tranzitoriu Dalan ba Dignifika Sobrevivente Vulneravel Liu”.
Hafoin halo lansamentu ba atividade emprezariál ne’e, iha (29 Jullu 2022). Organizasaun Sosiedade Sivil Internasionál (OSSI) OXFAM mak sai kliente visitór ba pakote Chega! Tour dahuluk hodi vizita sitiu istóriku sira hanesan; – Kuartel Polisia Portuges PIDE – Pusat kebudayaan Indonézia. – Kuartel Polisia Militär Portugués-Sede UDT. – Palasiu Governador Timor Portugés – Palasiu Governu. Toko Lay. Portu Dili. – Postu SGI-Uma privadu. – Kodim Dili-Casa Europa. – Rezidensia Manuel Carrascalao-Fundasaun Oriente. – Rezidensia Bispu Dili. – Eis Komarka sentral Kaikoli (Komarka Balide) CNC.
Tour ikus ba atividade iha Antigu Comarca Balide hodi haree ezibisaun sira kona-ba ezibisaun prizaun no prizoneiru politiku, ezibisaun kona-ba kronolojia istória 1974-1999, ezibisaun kona-ba servisu CAVR, ezibisaun kona-ba auto determinasaun no komunidade internasionál, ezibisaun kona-ba akontesimentu 1999, ezibisaun kona-ba direitus umanus, sala arkivu no sela nakukun.
Country Director OXFAM, Fausto Ximenes Belo apresia ba pakote Chega! Tour no ida ne’e sai hanesan jornada ida ba sosiedade atu halo vizita ba sítiu istóriku sira iha munisípi Díli hodi hatene istória pasadu prosesu luta ba ukun rasik-an.
Nia haktuir, programa ne’e sai hanesan maneira aprendisazen ida ba parseiru internasionál sira tanba sira halo servisu iha Timor, sira bele hatene istória Timor-Leste liuhosi Chega! Tour hodi haree fatin istóriku sira iha Díli.
Chega! Tour ne’e hanesan mós atividade refreshing ida ba ita nia memória liuhosi jornada ida ne’ebé ita nia aman sira, ita nia tia sira no ita nia avo sira husik hela mai ita. “Hau admira tebes ho parseria ida ne’e, espera katak ne’e mos sai lisaun no ezemplu ba kolega NGO sira seluk bele mai”.
Nia esplika tan, Oxfam nu’udar organizasaun sosiedade sivil internasional ne’ebe hola parte iha movimentu globál hodi luta ba hamenus desigualdade, pobreza no injustisa iha mundu no sai membru ida ba rede organizasaun sosiedade sivil sira seluk, promete sei halo mensajen ida ba rede ida ne’e hodi bele partisipa mós iha atividade pakote Chega! Tour.
Iha fatin hanesan, Programa Manajer ba Rezilensia Oxfam iha Timor-Leste, Cris Caetano konsidera atividade ne’e importante tebes tanba programa tour ida ne’e fó hanoin fila fali mai ita nu’udar Timor-oan atu bele hatene istória.
Nia informa, vizita fatin istóriku sira ne’e sai hanesan jornada ida ne’ebé uluk ita nia avo sira, ita nia maun alin sira hetan torturasaun ba. Tan ne’e, ho vizita sítiu istóriku sira ne’e, la’os iha Timor-Leste de’it, maibé iha nasaun seluk mós ema halo hanesan ne’e.
“Ida ne’e oportunidade boot ba ita atu hatene no ba ita nia jerasaun foun sira ne’e para atu hatene istória oinsá?. Hau nia hanoin ida ne’e dalan ida ne’ebé mak OXFAM internasionál NGO halo bele atrai ba iha NGO sira seluk”, nia esplika.
Maibé nu’udar Timor-oan ida ne’e mós hanesan pontu importante ba ita idak-idak liu-liu ba jerasaun foun sira nomós ita nia oan sira presiza lori sira mai halo vizita sítiu istóriku ne’e hodi hateten ba sira katak ida ne’e mak fatin ida ne’ebé hahú funu, torturasaun, detensaun mak ohin loron ita hetan ukun rasik-an.
Media Chega!
