Dili, iha loron 29 Jullu 2021, Centro Nacional Chega!I.P liu husi Diretór Divizaun Relasaun Esterna Komunikasaun no Advokasia (DREKA) Sr. Gaudencio Soares Souza no Diretór Divizaun Solidariedade Sosiál (DSS) Sr. Nelson Miranda Seixas hasoru malu ho Diretór Nasional Inkluzaun no Reinsersaun Komunitáriu iha MSSI Sr. Florencio Pina Dias Gonzaga hodi deskute kona-ba ajustamentu planu servisu Centro Chega! no MSSI tuir Nota Entendimentu iha Planu Anuál 2022.
Iha enkontru ne’e, Diretór Divizaun Relasaun Externa Komunikasaun no Advokasia (DREKA), Sr. Gaudencio Soares Souza informa kona-ba Centro Chega! ninia prezensa hodi halo koordenasaun servisu hodi prepara planu ba tinan 2022.
“Ami agora daudauk prepara hela planu, karik iha MSSI koloka, ne’e bele ajusta di’ak liu tan, para aban bainrua lori orsamentu ba karik ita bele hamutuk hodi defende orsamentu”, dehan Sr. Gaudencio iha enkontru koordenasaun servisu, iha Salaun Diresaun Nasional Inkluzaun, Reinsersaun Komunitariu, MSSI.
Sr. Gaudencio haktuir, foku diskusaun ne’e ko’alia kona-ba Nota Entendimentu (Memorandum Of Understanding) mak halo ona hodi fó apoiu ba sobrevivente mais vulneravel, ne’ebé uluk MSSI fó ona apoiu direita iha terreñu. Ida seluk fortalesementu institusionál ne’e depende ba instituisaun rua (Centro Chega! no MSSI). Ida tan mak reunifikasaun ema lakon. Pontu hirak ne’e mak Centro Chega! aloka nafatin iha planu 2022.
Agora kona-ba polítika nasionál reparasaun, asuntu ne’e liga ba Ministériu Solidariedade Sosial no Inkluzivu (MSSI) tanba ne’e mak Centro Chega! tinan ne’e, kontinua tau iha politika nasional ba reparasaun para ita bele hahú deskute ba oin hamutuk ho MSSI.
Ida seluk, asuntu ne’ebé iha relasaun ho Ministeriu Saude mak foku ba oinsa atu harii uma akonselamentu ba pos traumatiku sira tanba ita hotu hatene katak ita laiha sentru ida ne’ebé mak bele tau matan ba sobrevivente vulneravel liu.
Iha tempu hanesan, Diretór Divizaun Sosilidariedade Sosial (DSS) Sr. Nelson Miranda Seixas reforsa tan katak, Centro Chega! iha tinan ida ne’e kontinua halo rejistu ba sobrevivente sira, tuir dadus ne’ebé iha sobrevivente besik 120 mak rejistu ona.
Ida seluk, Centro Chega! nafatin komunika ho MSSK sira loke hela bolus estudu, lista ne’ebé mak agora CNC iha ne’e besik 200 sobrevivente nia oan ne’ebé mak atu eskola, maibe tuir kriteria ne’ebé mak FDCH no MSSK iha entaun susar oituan tanba sira tenke tama eskola lai, depois nia IPK ne’e tenke 2.75 ba leten. Agora ami rejista ne’e, sira remata SMA ninia valor atu tama UNTL mos susar.
Bazeia ba esplikasaun ne’e, Diretór Nasional Inkluzaun no Reinsersaun Komunitáriu, MSSI. Sr. Florencio Pina Gonzaga informa, MSSI iha ninia organika ka diploma rasik ne’ebé mensiona klaramente iha laran kona-ba implementasaun rekomendasaun Chega!.
“Implementasaun rekomendasaun Chega! iha Planu Anuál 2021 ba oin, sita tiha ona iha ami ninia organika ka diploma rasik, ne’ebé mensiona klaramente iha laran”, Sr. Florensio garante.
Tanba ne’e, nia garante nafatin katak implementasaun rekomendasaun Chega! hodi integra ba iha planu annual 2021 no 2022 ne’e kontinua nafatin tanba ne’e mak iha planu estratejiku 2021 mos mensiona konaba politika apoiu vitima ba pasadu.
Nia agradese ba Chega! tanba bele hasoru malu halo diskusaun direitamente kona-ba ajustamentu planu estratejiku 2022 nian. Espera katak ba futuru Centro Chega! no MSSI nafatin iha kooperasaun di’ak hodi aliña politika, planu no programa sira iha implementasaun atividade.
