Dili, (28 Juñu 2024) – Centro Nacional Chega! Instituto Publiku (CNC I.P) hamutuk ho CHL (Community Housing Limited) nu’udar parseiru implementadór entrega Uma “Da Memória À Esperança” ba Sobrevivente Lucia de Jesus iha Suku Aisirimou, Postu Administrativu Aileu Vila, Munisipiu Aileu. Serimonia ne’e realiza iha suku Aisirimou, loron Sexta-feira (28 Juñu 2024). Objetivu prinsipal husi serimonia entrega uma ba Sobrevivente Lucia de Jesus atu dignifika no valoriza sira nia kontribuisaun luta ba ukun rasik-an.
Istória badak Sobrevivente Lucia de Jesus
Sobrevivente Lucia de Jesus moris iha 05 Jullu 1960, Suku Acubilitoho, Postu Administrativu Liquidoe, Munisipiu Aileu. Agora dadaun hela iha Suku Aisirimou, Postu Administrativu Aileu Vila, Munisipiu Aileu.
Lucia de Jesus konta katak, nia ho idade 12 hetan ona violasaun seksual husi Militar Indonesia iha KORAMIL Aileu bainhira fila husi eskola. Militar Indonézia ho naran (Ruslam-husi Jakarta), kaer nia no halo violasaun direitus umanus hasoru nia iha KORAMIL Aileu.
Rezultadu husi violasaun ne’e, Lucia de Jesus konsege hetan oan 1 maibé nia mate tiha. Iha loron ida militar Indonézia KORAMIL (ho naran SONO ema Sulawesi) hola nia no nia fo oan 3 ba nia.
Lucia de Jesus la’os hetan de’it violasaun direitus umanus, maibé nia mos hetan torturasaun oi-oin husi Militar Indonesia. Hafoin timor ukun-an Lucia de Jesus hola fali mane ne’ebé agora matebian ona iha oan nain 3.
Iha tinan 1999 sobrevivente Lucia de Jesus, hamutuk ho familia muda obrigatoriu ba Atambua no iha tinan 2002 ho familia fila hikas mai Timor-Leste ne’ebé hela iha munisipiu Aileu to’o agora.
Tuir asesmentu ne’ebé Centro Chega!I.P halo identifika katak, kondisaun atual vitima Lucia de Jesus oras ne’e iha problema kondisaun saude mental tanba iha trauma ho situasaun pasadu, no halo nia iha emosaun lalais. Agora nia iha kondisaun problema fiziku tanba ema ko’alia rona lamos, kondisaun uma ladi’ak, uma ne’e sira hela husi tinan 1998 to’o agora no uma ne’e nia kondisaun at ba beibeik.
Nune’e, Centro Nacional Chega!I.P servisu hamutuk ho CHL (Community Housing Limited) hanesan parseiru implementadór halo uma “Da Memória À Esperança” ba Lucia de Jesus iha suku Aisirimou. Uma ho medida 63m2, kompostu husi kuartu 3, sala vizita 1, haris fatin 1 no dapur iha parte liur ho medida 7,5m2. Uma ida ne’e harii ho montante osan kuaze USD 24,091.86.
Uma “Da Memória À Esperança” nudar parte ida husi implementasaun Mandatu Centro Chega! nian tuir Dekretu Lei 48/2016 mak atu tau-matan no apoiu Sobrevivente sira husi Violasaun Direitu Umanu ne’ebé akontese iha periodu1974-1999. Nune’e mos nudar programa prioridade Governu nian ne’ebé hatur iha CNC nia responsabilidade atu fo tulun ba prezervasaun memória pasadu sira no kontinua promove direitu umanu no rekonsiliasaun.
Media Chega!
