(Díli, 11 Marsu 2026) – Centro Nacional Chega!.I.P servisu hamutuk ho Movimentu Letras, Sala Leitura Xanana Gusmão, Abut, Tio Publising no Comite Orentador 25 (CO25) organiza atividade Feira Livru, iha ámbitu Komemorasaun Loron Nasional Veteranus ba dala-9, ne’ebé realiza iha Muzeu Chega!, Antigo Comarca Balide.

Objetivu prinsipal husi atividade Feira Livru ne’e, atu promove kultura lee iha publiku liu-liu estudantes sira ne’ebé susar asesu livru. Promove no valoriza matenek Timoroan sira nian. Kriasaun espasu ba dialogu no diskusaun. Kriasaun espasu ba komunidade sira atu asesu ba livru. Promove kultura leitura iha komunidade no mos promove livru oin-oin kona-ba istória, direitus umanus, paz no rekonsilisaun iha komunidade.

Objetivu seluk mak, atu promove kolesaun livru mak Biblioteka Chega! iha no mos atu estimula kultura lee entre foin sa’e sira no aprende istória Timor-Leste. Alende ne’e, Feira Livru mos atu hametin kooperasaun entre biblioteka sira iha Dili liu husi realizasaun atividade sira hamutuk nu’udar opsaun ba publiku kona-ba referesia livru sira maibé mos dalan ida atu biblioteka sira kompleta ninia kolesaun sira.

Feira Livru ne’e sei hala’o durante loron 2 hahu iha loron Kuarta-feira to’o Kinta-Feira, (11-12 Marsu 2026), ne’ebé sei kompleta ho atividade sira mak hanesan; Feira Livru, Diskusaun Livru, Human Library no Story Telling.

Feira Livru hola parte iha atividade Centro Chega!l.P liu husi Divizaun Edukasaun no Formasaun (DEF) iha atividade Jestaun Biblioteka ho nia knaar prinsipal ida mak atu promove Biblioteka Centro Chega!I.P nu’udar sentru sabedoria ida ne’ebé asesível ba ema hotu liu-liu foinsa’e ka estudante hodi hatene kona-ba istória no memória pasadu Timoroan nian ne’ebé mak prezerva iha Centro Chega!I.P.

Entertantu, atividade hirak ne’e hala’o hodi hatan ba mandatu Centro Chega!I.P nian ho baze ba dekretu lei Nu. 48/2016 katak kontinua hala’o nafatin ba servisu sira ne’ebé Comissão de Acolhimento, Verdade e Reconciliação (CAVR) no Comissão Verdade e Amizade (CVA) hala’o tiha ona. Vizaun mak prezerva memória pasadu nian nu’udar lisaun ba Povu Timor-Leste no umanidade tomak hodi hetan dame. Misaun mak hari’i sentru póz-konflitu ne’ebé prezerva memória pasadu nian hodi promove direitu no valor umanu; Hari’i parseria nasional no internasional hodi reforsa rede servisu sira atu implementa rekomendasaun CAVR no CVA ne’ebé relevante.

Bele download dokumentus iha ne’e:PDF Kom.Imprensa Feira Livru