Dili – (12 Maiu 2026), Kameli Timor International School lori estudante hamutuk na’in 25 hala’o vizita dahuluk mai iha Muzeu Chega!. Objetivu husi vizita ne’e, mak atu aprende istória Timor-Leste ne’ebé Centro Chega!I.P prezerva hahu husi sekuensia akontesimentu sira, istória narativa vitima no sobrevivente sira, ezibisaun kona-ba violasaun direitus umanus pasadu, vizita kadera eletriku no vizita sela nakukun nu’udar fatin detensaun, torturasaun no violasaun direitus umanus oin-oin ba timoroan sira ne’ebé luta ba ukun rasik-an.
Hafoin remata vizita, Diretora Kameli Timor International School, Rini Alves da Cruz hateten, razaun lori estudante sira mai vizita Muzeu Chega! atu estudante sira aprende no koñese di’ak liu tan istória pasadu ne’ebé prezerva iha Muzeu Chega!. Nia afirma, estudante sira aprende istória Timor-Leste atu hametin sentidu nasionalizmu nu’udar timoroan.
Vizita ne’e mos parte ida atu kompleta materia istória ne’ebé manorin sira fo. Nia subliña, iha Kameli Timor International School iha materia istória Timor-Leste, maibé materia ne’e hanorin ho lingua Inglesh. Ho vizita ne’e bele ajuda estudante sira hatene klean liu tan, tanba ne’e, agradese Centro Chega!I.P tanba bele simu no fasilita sira ho di’ak.
“Ami agradese tanba ami foin primeira vez mai iha fatin ida ne’e, ami nia estudante sira bele hatene buat barak no sira bele haree direitamente, sira mos sente triste oituan istória ne’ebé mak soke duni sira oinsa sira nia avo sira luta ba nasaun ida ne’e. Depois de ezame ami sei lori nafatin labarik sira mai para atu aprende”, Diretora afirma.
Entertantu, Kameli Timor International School harii iha Novembru 2022. Eskola ne’e nia prosesu aprendizajen hahu iha tinan letivu 2023 no hetan inagurasaun ofisialmente iha loron 21 Janeiru 2023 husi Ministériu Edukasaun (ME).
Media Chega!.
