Dili, 24 Janeiru 2025 – Instituto Nasional Seguransa Sosiál (INSS) halo sosializasaun kona-ba Lei no Sistema Seguransa Sosiál ba funsionariu Centro Chega!I.P iha Salaun Konferénsia Centro Chega! Antigo Comarca Balide – Dili. Objetivu husi sosializasaun ida ne’e mak atu hasa’e funsionáriu sira nia koñesimentu kona-ba direitu funsionáriu ba Seguransa no Asisténsia Sosiál liu-liu proteje traballadór sira kontra risku sosiál, iha nia vida  tomak, no substitui rendimentu servisu iha situasaun ne’ebé lakon rendimentu, no prestasaun sosiál sira hodi substitui saláriu iha futuru no mos hadia atividade ekonómika, liu husi sirkulasaun moeda no manutensaun ba nível konsumu ne’ebé esensiál ba atividade empreza.

Asesór Prinsipál INSS Jeferino Bobo iha nia aprezentasaun esplika katak, sistema seguransa sosiál, nu’udar sistema ida ne’ebé atu asegura direitu umanu fundamentál ba sidadaun hotu-hotu no garante  nível bein-estar adekuadu, nomós proteje sidadaun sira durante siklu tomak moris nian. Seguransa Sosiál proteje sidadaun sira antes moris (proteje iha maternidade) no hafoin mate (liuhusi pensaun sobrevivénsia ba família  benefisiáriu matebian).

Nia haktuir, garantia ida ne’e konsagra iha Artigu 56.º Konstituisaun Repúblika Demokrátika Timor-Leste ” ne’ebé haktuir ba lei, “Sidadaun hotu-hotu iha direitu ba seguransa no asisténsia sosiál ”. Alende ne’e, sita mos Deklarasaun Universál Direitus Umanus (DUDU) 1948, iha Artigu 22º kona-ba  Direitu ba Seguransa Sosiál, ne’ebé hatete, “Ema hotu-hotu, nu’udar membru sosiedade, iha direitu ba seguransa sosiál no bele lejitimamente eziji nia satisfasaun ba direitu ekonómiku, sosiál no kulturál ne’ebé indispensável, agradese ba esforsu nasionál no kooperasaun internasionál, liuhusi armonia ho organizasaun no rekursu husi kada nasaun”.

Centro Nacional Chega! I.P. (Centro Chega!) estabelese tuir Dekretu Lei Nu. 48/2016 nu’udar institutu públiku ida no nia funsionáriu sira komesa ona kontribui ba Seguransa Sosiál iha tinan 2018.

Media Chega!