Inan nia hein ba Oan Feto Adelia Araujo- Juventude Lorico Aswa’in, Sobrevivente 12 Novembru.
Adelia, Oan feto mesak husi inan ida ne’ebé mak sempre la’o buka no husu tuir. Loron ba loron nia hein nafatin hanesan oan feto murak foin lakon loron rua. Nia sei iha fiar ida katak nia oan feto sei fila orsida ou aban madrugada.
“Wainhira rai nakaras ha’u sente laran taridu, ha’u tuur iha varanda hanoin katak nia sei fila mai antes nakukun liu ona hanesan bai-bain nia fila husi ensaiu. Hein ida ne’e iha lokraik… iha lokraik barak ona. Dala ruma lalatak husi labarik feto viziñu ida mak liu halo ha’u sempre hakfodak hanoin nia mak mosu mai karik. Wainhira haree ema nia oan fetoran ruma la’o fila kotuk ha’u hateke tuir, ha’u sente hanesan nia mak ba dadauk ne’ebá. Matan ben ne’e sempre sulin no sulin nafatin ba ha’u nia oan feto mesak, oan feto ne’ebé sempre hamanasa kontente iha uma ne’e, iha nia kuartu no…. ha’u saudades loos hakarak rona nia lian bolu ama iha dadeer wainhira nia buka feixu ou buka meias ne’ebé nia mak tau sala iha fatin ruma”
…
* Nia lakon la’ó tanba la’o sala dalan… nia la fila la’ós tanba nia lakoi atu fila.. maibé nia sakrifika nia an ba dalan loos ida ba objetivu 1 de’it, no simu konsekuésia nu’udar feto nurak Lorico Asuwa’in ida * …
RIP Adelia Taibesi…
(Hakerek nain: DINO HANJAM – Sobrevivente 12 Novembru – Juventude Lorico Asuwa’in).
